Almaty ákímí Darhan Satybaldynyń Qytaı Halyq Respublıkasynyń Shanhaı qalasyna jasaǵan jūmys sapary ayasynda jahandyq UBTECH Robotics kompanıyasy jáne qazaqstandyq NERO Group tehnologıyalyq kompanıyasymen jasandy ıntellekt negízíndegí bílím beru jáne servıstík robottardy óndíru jáne engízu boıynsha Almatyda bírlesken kásíporyn qūru turaly nıet hatqa aldyn ala qol qoıyldy, dep habarlaıdy aqshamnews.kz
Kelísímge sáıkes, Almaty ákímdígí bírlesken kásíporyn qūruǵa jáne onyń ónímderín ílgeríletuge jan-jaqty qoldau kórsetuge daıyn. Atap aıtqanda, Qazaqstan Respublıkasynyń bílím beru, jasandy ıntellekt jáne tsıfrlyq damu salalaryna jauapty memlekettík organdarymen ískerlík baılanystardy jolǵa qoyuǵa járdemdesu kózdelgen.
Óz tarapynan UBTECH Robotics bírlesken kásíporynǵa oqu-ádístemelík materıaldar, baǵdarlamalyq qamtamasyz etu, tehnologıyalar men ınjenerlík sheshímderdí, sondaı-aq jasandy ıntellektke negízdelgen bílím beru jáne servıstík robottardy óndíru tehnologıyasyn ūsynuǵa ázír. Sonymen qatar, UBTECH seríktespen bírlesíp gumanoıd robottardy qoldanudyń kommertsıyalyq stsenarıılerín ázírleuge baǵyttalǵan ǵylymı-zertteu jáne tájírıbelík-konstruktorlyq jūmystar (ǴZTKJ) júrgízetín bolady.
UBTECH-tíń jergílíktí seríktesí retínde NERO Group Almatyda óndírístík quattardy jáne daıyndalǵan tehnıkalyq kadrlardy ūsyna alady, sondaı-aq bírlesken kásíporyndy basqarudyń operatsıyalyq qyzmetíne qatysuǵa daıyn.
2026 jyldyń sońyna deıín taraptar bírlesken marketıngtík zertteudí ayaqtap, Almatyda UBTECH servıstík robottaryn shyǵaru jáne olardy Qazaqstan men Ortalyq Azıya naryǵyna jetkízu boıynsha ekonomıkalyq oryndylyq jónínde sheshím qabyldaudy josparlap otyr. Sonymen qatar, jergílíktí joǵary oqu oryndarymen bírlese otyryp, gumanoıd robottardy qyzmet kórsetu, óndírís jáne logıstıka salalarynda qoldanu stsenarıılerí ázírlenetín bolady.