Túrkistan oblysyndaǵy alapat órtten aman qalǵan balanyń jaǵdaıy óte aýyr. Al eki eresek adamnyń az da bolsa beti beri qaraǵan, - dep habarlaıdy aqshamnews.kz tilshisi ktk.kz-ke silteme jasap.
"Búginde eki eresek adamnyń jaǵdaıy turaqty. Zardap shekkender Shymkentke jetkizilip, olarǵa kómek kórsetilip jatyr. Degenmen balanyń jaǵdaıy óte aýyr. Mamandar keńes berip, em-domyn túzetip, balanyń jaǵdaıyn baǵalap otyr. Densaýlyq saqtaý mınıstrligi jaǵdaıdy qadaǵalap otyr", - dedi densaýlyq saqtaý vıse-mınıstri Tımýr Sultanǵazıev.
Jetisaı aýdanynyń Alǵabas aýylyndaǵy órt ótken seısenbi kúni bolǵan. Eki qabatty úıde tutanǵan órt 12 adamnyń ómirin jalmaǵan edi. Onyń toǵyzy - bala. Aǵaıyndy jigitter bala-shaǵasymen toıdan kelip shyrt uıqyǵa ketken beti eken. Órtsóndirýshiler birinshi es-tússiz jatqan úsh adamdy qutqaryp, aýrýhanaǵa jetkizdi. Aman qalǵan eki eresek adamnyń qazirgi jaǵdaıy turaqty. Al kishkentaı bala hál ústinde. Oǵan kómek kórsetý úshin Almatydan arnaıy joǵary bilikti mamandar shaqyrylypty.