Qasym-Jomart Toqaev ǵylymdy qarjylandyru ísíne qatań tártíp kerek, qarajatty basymdyqtarǵa qaraı jūmsaǵan jón dep sanaıdy, – dep habarlaıdy aqshamnews.kz tílshísí.
– Memleket sońǵy alty jylda ǵylymǵa arnalǵan qarjyny bírneshe ese ūlǵaıtty. Jyl saıyn ǵylymǵa 200 mıllıard teńgeden astam, típtí, būdan da kóp, 500 mıllıon dollardan asa qarjy bólínedí. Būl – Qazaqstan úshín qomaqty aqsha. Alaıda ǵylymdy qarjylandyrudyń naqty nátıjesín ázírge kóre almaı otyrmyz. Bas prokuratura salalyq mınıstrlíkte jáne Ǵylym qorynda kóptegen árí auqymdy qarjylyq zańbūzushylyqtarǵa jol berílgenín áshkereledí. Nelíkten osylaı bolǵanyn tap basyp aıtu qıyn. Grant alushylardy akkredıtteuden bastap qarjylandyru úderísíníń barlyq kezeńínde kemshílíkter kózge kóríníp tūr. Meníń túsínígímde, ǵylym men jemqorlyq bír bíríne kereǵar qūbylys, ekeuí qatar atalmauǵa tıís. Memleket qarjysyn jymqyrǵysy keletín kez kelgen áreketke tosqauyl qoyatyn súzgí ne kedergí joq. Ǵylymı úderístí damytudyń tūjyrymdy kózqarasy qalyptaspaǵan. «Áıteuír qarajatty qalaıda ıgersek boldy» degen ūstanym tamyr jaıǵan. Ǵylymı jūmystyń naqty paıdasy, jańashyldyǵy qandaı? Oǵan eshkím bas qatyrmaıdy. Būǵan qosa, saraptama ūzaqqa sozylady. Jobalar uaqtyly íske aspaıdy. Úkímet atalǵan máselelerdí egjeı-tegjeılí tekseríp, jaǵdaıdy túzeu úshín shūǵyl sharalar qabyldauy qajet, – dedí Prezıdent.