Jańadan qūrylǵan Alatau qalasynda aerotaksı júıesín íske qosu josparlanyp otyr, dep habarlaıdy aqshamnews.kz
Osy maqsatta Jasandy ıntellekt jáne tsıfrlyq damu mınıstrlígí, amerıkalyq Joby Aero, Inc. kompanıyasy, Alatau Advance Air Group Ltd. jáne kásípker Vyacheslav Kım ózara túsínístík jóníndegí memorandumǵa qol qoıdy.
Qūjat ayasynda shamamen 300 mln AQSh dollaryna elektrlí eVTOL ūshaqtaryn satyp alu kózdelíp otyr.
Mınıstrlík 2025 jylǵy 7 qarashada habarlaǵandaı, tígínen ūshyp-qonatyn ınnovatsıyalyq ūshu apparattary Qazaqstandaǵy alǵashqy qalalyq áue mobıldílígí (Urban Air Mobility) jobasynyń negízí bolmaq. Joba ayasynda sertıfıkattau jáne demonstratsıyalyq ūshularǵa arnalǵan synaq alańyn qūru, sondaı-aq Alatau men Almaty qalalarynyń kólík jelísíne áue taksıdí ıntegratsıyalau josparlanuda.
"Qazaqstan ınnovatsıyalyq kólíktíń bolashaǵyna qadam basuda. Elektrlí eVTOL ūshaqtaryn satyp alu – smart qalalar men zamanauı tehnologıyalardy engízu baǵytyndaǵy mańyzdy kezeń. Būl shara Alatau qalasyn bolashaqtyń joǵary tehnologıyaly, bíregeı qala retínde damytuǵa serpín beredí", – dedí Qazaqstan Respublıkasynyń Premer-mınıstríníń orynbasary – Jasandy ıntellekt jáne tsıfrlyq damu mınıstrí Jaslan Mádıev.
Joby Aero, Inc. – eVTOL avıatsıya salasyndaǵy álemdík kóshbasshy, sertıfıkattalǵan elektrlí áue taksıleríníń ázírleushísí.
