Air Astana áýe kompanıasy 4 qańtar kúni Astanadaǵy aýa raıynyń qolaısyzdyǵyna baılanysty reısterdiń keshigýi men ushý kestesindegi ózgerister áli de jalǵasyp jatqanyn málimdedi, dep habarlaıdy aqshamnews.kz.
Áýe kompanıasy Almatydan jáne basqa qalalardan ushatyn jolaýshylarǵa áýejaıǵa shyǵar aldynda reıs mártebesin aldyn ala tekserýge keńes berdi.
Buǵan deıin Air Astana 3 qańtardan 4 qańtarǵa qaraǵan túni Almatydan ushatyn Airbus A320neo úlgisindegi ushaqtarǵa qatysty reısterdiń keshigetini jóninde habarlaǵan bolatyn. Kompanıa muny Astanadaǵy aýa raıyna baılanysty engizilgen ushý shekteýlerimen túsindirdi. Atap aıtqanda, tuman túsip, kóriný qashyqtyǵynyń tómendeýi jaǵdaıdy kúrdelendirgen.
Air Astana ushý kestesin qalpyna keltirý úshin qajetti sharalar qabyldanyp jatqanyn aıtyp, sonyń ishinde FlyArystan áýe kompanıasynan qosymsha rezervtik ushaq tartylǵanyn jetkizdi.