Almatyda sıfrlyq medısına bolashaq emes — ol qazirdiń ózinde jumys istep tur.
Almaty Digital Medical Center (ADMC) bazasynda qalanyń turǵyndary úıden shyqpaı-aq dárigerden keńes alyp, anyqtamalyq aqparatqa qol jetkizip, tipti densaýlyǵyn qashyqtan baqylaýdan óte alatyn ortalyq jumys isteıdi, - dep habarlaıdy Aqshamnews.kz.
Almaty Digital Medical Center Almaty qalasynyń Qoǵamdyq densaýlyq basqarmasy men Sıfrlandyrý basqarmasynyń qoldaýymen qurylǵan.
Jobanyń maqsaty — árbir turǵyn úshin medısınalyq kómekti barynsha jyldam, yńǵaıly jáne qoljetimdi etetin biryńǵaı sıfrlyq densaýlyq saqtaý ekojúıesin qurý.
ADMC qyzmetiniń negizgi baǵyttarynyń biri — táýlik boıy qysqa 1312 nómiri arqyly jumys isteıtin Biryńǵaı baılanys ortalyǵy (BBO).
Munda operatorlar men dárigerler shuǵyl kómekti qajet etpeıtin barlyq medısınalyq suraqtar boıynsha keńes beredi, qabyldaýǵa jazylýǵa kómektesedi, jaqyn mańdaǵy dárihana nemese zerthanany tabady, qajet bolǵan jaǵdaıda beıindi mamandarǵa baǵyttaıdy.
Kún saıyn ADMC qyzmetkerleri shuǵyl jedel járdem shaqyrylǵannan keıin úıde qaldyrylǵan pasıentterge 1 500-den astam qońyraý shalyp, olarǵa polıklınıkalardyń múmkindikteri men kómek alý marshrýttary týraly aqparat beredi.
«Bizdiń jumysymyzdyń basty nátıjesi — myńdaǵan almatylyq ýaqytyly keńes alyp, asqynýlardyń aldyn alady», — deıdi baılanys ortalyǵynyń jetekshisi Shyryn Tolekova.
Qashyqtan densaýlyq monıtorıńi júıesi sozylmaly aýrýlary bar naýqastardy, júkti áıelderdi, bir jasqa deıingi balalardy jáne aýrýhanadan keıin baqylaýda turǵan adamdardy qamtıdy.
Búginde 110 myńnan astam turǵynnyń densaýlyǵyn táýlik boıy 30-dan astam dáriger baqylaýda ustap otyr.
2025 jyldyń maýsymynan beri 15 myń pasıent kezekten tys qabyldaýǵa jiberilse, shamamen myń adam aýrýhanaǵa jatqyzylǵan.
Qashyqtan densaýlyq monıtorıńi jobasy áıelderdi júktiliktiń barlyq kezeńinde jáne bosanǵannan keıin 42 kún boıy baqylap, aı saıyn 3 200-den astam júkti áıeldi qamtıdy.
«Tórt aı ishinde biz shuǵyl kómekti qajet etken, biraq polıklınıkaǵa júginbegen 362 júkti áıeldi anyqtadyq. Qaýipterdi ýaqytynda anyqtaı aldyq», — dedi Shyryn Tolekova.
Sıfrlyq baqylaýdyń arqasynda sozylmaly aýrýlary bar pasıentterdi qamtý 27%-dan 48%-ǵa ósse, bosanǵannan keıingi patronaj 28%-dan 81%-ǵa artty.
1312 nómiri boıynsha jumys isteıtin Biryńǵaı baılanys ortalyǵynyń tanymaldyǵy artyp keledi: maýsymda ortalyqqa 8 myń ótinish túsken bolsa, qazanda bul kórsetkish 50 myńnan asyp tústi.
Turǵyndar keńes alyp, qabyldaýǵa jazylady, polıklınıkaǵa tirkelý tártibi týraly aqparat alady, sondaı-aq shaǵymdary men alǵystaryn qaldyrady.
ADMC platformasyna qazirdiń ózinde segiz qalalyq polıklınıka qosylǵan, bul alǵash ret tirkeý bólimderiniń júktemesin jáne pasıenttermen baılanysty naqty ýaqyt rejıminde baqylaýǵa múmkindik berdi.
Aldaǵy ýaqytta Almatydaǵy barlyq polıklınıkalardy júıege qosý josparlanyp otyr, bul azamattardyń ótinishterin tolyq sıfrlyq baqylaýdy qamtamasyz etip, medısınalyq kómektiń qoljetimdiligin arttyrady.
«Buryn pasıentterdiń polıklınıkalarǵa qońyraý shala alǵan-shalmaǵanyn bilmeıtinbiz. Endi naqty jaǵdaıdy kórip otyrmyz: qońyraýlardyń shamamen 37%-y jaýapsyz qalǵan. Biz júıeli jumys bastap, kútý ýaqytyn eki ese qysqarttyq», — dep habarlady ADMC ókilderi.
Osynyń arqasynda polıklınıkalarǵa beıindi emes suraqtar boıynsha túsetin júkteme úsh ese azaıdy, al pasıentterge qyzmet kórsetý sapasy jaqsardy.
Ortalyqta gınekologtar, pedıatrlar, terapevter, hırýrgter, psıhıatrlar, ýrologtar jáne basqa da mamandar jumys isteıdi.
Kásibı biliktilik pen zamanaýı tehnologıalardyń úılesimi kómekti qoljetimdi ǵana emes, sonymen qatar sapaly etedi.
Almatydaǵy sıfrlyq densaýlyq saqtaýdyń damýy — tehnologıalardyń qala turǵyndarynyń densaýlyǵyn jaqsartýǵa jáne medısınany ár adamǵa jaqyndatýǵa qalaı kómektesetinine jarqyn dálel.