«Ádílet» partıyasynyń kezekten tys III Sezí mańyzdy sayası sheshímder qabyldanǵan alań ǵana emes, sonymen qatar azamattarmen baılanystyń zamanauı tetíkterín damytuǵa jáne partıya qyzmetíníń tıímdílígín arttyruǵa baǵyttalǵan jańa tsıfrlyq sheshímderdí tanystyrǵan mańyzdy shara boldy, – dep habarlaıdy aqshamnews.kz tílshísí.
Tanystyrylǵan servıster partıyanyń Bíryńǵaı tsıfrlyq platformasyn kezeń-kezeńímen qalyptastyru jóníndegí júıelí jūmystyń bír bólígí. Būl platforma aldaǵy uaqytta azamattarǵa, partıya músheleríne jáne partıya organdaryna arnalǵan tsıfrlyq qūraldardy bír ortaǵa bíríktíre otyryp damıdy.
Alǵashqy sheshímderdíń bírí retínde partıyanyń tsıfrlyq qyzmetterín paıdalanudyń bíryńǵaı júıesí íske qosyldy. Búgínde partıyaǵa múshelíkke ótíníshtí QR-kod arqyly, eGov portaly nemese osy qyzmettí qoldaıtyn bank qosymshalary arqyly beruge bolady. Būl qyzmettí qarapaıym, yńǵaıly árí qauípsíz paıdalanuǵa múmkíndík beredí.
Sezd ayasynda jasandy ıntellekt tehnologıyalary negízínde ázírlengen ıntellektualdy tsıfrlyq kómekshíler de tanystyryldy. Olar partıyanyń baǵdarlamasy turaly aqparat ūsynyp, múshe retínde qabyldau tártíbín túsíndíríp, eń jıí qoıylatyn sūraqtarǵa jauap beredí jáne paıdalanushylarǵa tsıfrlyq servısterdí qoldanuǵa baǵyt-baǵdar kórsetedí. Paıdalanushylarmen ózara baılanys partıyanyń fırmalyq tsıfrlyq maskoty men avtomattandyrylǵan chat-bottar arqyly júzege asyrylady.
Ázírleníp jatqan tsıfrlyq ekojúıeníń taǵy bír mańyzdy bólígí – partıya múshesíníń jeke kabınetí. Ol negízgí tsıfrlyq servısterdí bír ınterfeıske bíríktíríp, partıyalyq aqparatqa, habarlamalarǵa, qūjattarǵa jáne ózge de baılanys qūraldaryn paıdalanuǵa múmkíndík beredí. Platforma damyǵan saıyn onyń funktsıonaldyq múmkíndíkterí de keńeıtíledí.
Sonymen qatar partıya qūrylymdarynyń jūmysyn úılestíruge arnalǵan arnaıy tsıfrlyq alań – tsıfrlyq shtabty synaqtan ótkízudí bastady. Būl sheshím bírlesken jūmysty ūıymdastyruǵa, tapsyrmalardyń oryndaluyn baqylauǵa jáne ortalyq apparat pen óńírlík fılıaldar arasyndaǵy baılanystyń tıímdílígín arttyruǵa arnalǵan.
Sezde tanystyrylǵan tsıfrlyq qūraldar partıyanyń ūıymdastyru jūmystaryn kezeń-kezeńímen tsıfrlandyru baǵytyn aıqyn kórsetedí. Aldaǵy uaqytta olardyń barlyǵy azamattardyń partıyamen baılanysyna, íshkí úderísterdí qoldauǵa jáne jańa ıntellektualdy servısterdí engízuge arnalǵan zamanauı tsıfrlyq orta retínde qūrylyp jatqan «Ádílet.365» bíryńǵaı tsıfrlyq platformasyna bíríktíríledí.
«Zamanauı tehnologıyalar adamdar úshín úderísterdí barynsha qarapaıym árí túsíníktí etuí tıís. Sondyqtan partıya tsıfrlyq servısterdí íshkí jūmysqa da, azamattarmen kommunıkatsıyaǵa da belsendí túrde engízíp keledí», - dep atap óttí partıya ókílderí.
Sezdegí taǵy bír mańyzdy oqıǵa – partıyanyń resmı ánūranynyń tūsaukeserí. Ánūrannyń negízíne ádíldík, zań ústemdígí, tártíp pen jauapkershílík ıdeyalary arqau bolǵan. Ol alǵash ret kezekten tys III Sezdíń delegattaryna oryndalyp, partıyanyń jańa sımvolyna aınaldy.
Sezde tanystyrylǵan tsıfrlyq sheshímder partıya jūmysyn ūıymdastyru tásílderín jetíldíru, azamattarmen baılanys qūrudyń zamanauı arnalaryn damytu jáne tsıfrlyq tehnologıyalardy kúndelíktí qyzmetke engízu baǵytynyń mańyzdy bólígíne aınaldy.