Búgin osy kásibı merekege oraı QR ekologıa, geologıa jáne tabıǵı resýrstar mınıstrliginde saltanatty jıyn ótti.
QR Ekologıa, geologıa jáne tabıǵı resýrstar mınıstri Maǵzum Myrzaǵalıev sý salasy qyzmetkerlerin, ardagerlerdi kásibı merekesimen quttyqtady, dep habarlaıdy Almaty-akshamy.kz atalǵan mınıstrliktiń baspasóz qyzmetine silteme jasap.
Eske sala ketsek, bul kásibı mereke Qazaqstan Respýblıkasyndaǵy merekelik kúnderdiń tizbesin bekitý týraly Qazaqstan Respýblıkasy Úkimetiniń qaýlysy boıynsha bekitilgen.
Quttyqtaý sózinde mınıstr Memleket basshysynyń sý salasyn damytý máselelerine kóp kóńil bóletinin atap ótti. Birqatar mańyzdy strategıalyq mindetter qoıylǵanyn eske saldy. Mysaly, Prezıdent sýarmaly jer kólemin 2030 jylǵa deıin aǵymdaǵy 1,6 mln. gektardan 3 mln. gektarǵa deıin ulǵaıtý jóninde tapsyrma berdi. Sondaı-aq, apatty sý qoımalaryn qalpyna keltirý, kanaldardy sıfrlandyrý, toptyq sý qubyrlaryn salý qarastyrylǵan.
«Sizder sý resýrstaryn utymdy paıdalaný men qorǵaýdyń qazirgi zamanǵy tehnologıalaryn qoldana otyryp, olardy bolashaq urpaq úshin saqtaý maqsatyndaǵy memlekettik saıasatty iske asyrýda joǵary kásibı deńgeıde qamtamasyz etip kelesizder. 2020 jyly 813 km kanal qaıta jańartyldy. Bul 53,5 myń ga sýarmaly jerdi aınalymǵa engizýge, 26 myń jumys ornyn qurýǵa jáne aýyl sharýashylyǵy óniminiń kólemin 30 mlrd.teńgeden astam somaǵa ulǵaıtýǵa múmkindik berdi. Bıyl 78 myń ga sýarmaly jerdi aınalymǵa engizý úshin 1050 km ırrıgasıalyq jelini qalpyna keltirý josparlanǵan. Bul jyl saıyn 66 mlrd. teńgege aýyl sharýashylyǵy ónimderin óndirýge jáne 16 myń turaqty jumys ornyn qurýǵa múmkindik beredi», - dedi mınıstr.
Sondaı-aq, mınıstr sýdy sapaly jáne tıimdi paıdalaný maqsatynda 2020 jyly Túrkistan oblysynda uzyndyǵy 12 km magıstraldyq arnany sıfrlandyrý boıynsha pılottyq joba iske asyrylǵanyn eske saldy. Bul sýarmaly sýdyń artyq shyǵynyn anyqtaýǵa múmkindik berdi. Taıaýdaǵy 5 jyl ishinde uzyndyǵy 2,8 myń shaqyrymnan asatyn 119 arnany sıfrlandyrý josparlanyp otyr.
Saltanatty jıynda sý sharýashylyǵy qyzmetkerleri arasynda «Sý sharýashylyǵynyń ardageri» atanǵandar, «Sý sharýashylyǵynyń úzdigi» tósbelgisin taqqandar jáne Qurmet gramotasymen marapattalǵandar da boldy.