Almatyda Júrsín Ermannyń 75 jyldyq mereıtoıyna arnalǵan saltanatty kesh óttí. Aqshamnews.kz tílshísí kontsertten fotoreportaj ūsynady.
Almaty qalasynda Respublıka Saraıynyń sahnasynda qazaq poezıyasynyń kórnektí ókílí, Qazaqstannyń eńbek síńírgen qaıratkerí Júrsín Ermannyń 75 jyldyq mereıtoıyna arnalǵan "Ūlytaudan – Alatauǵa" atty kontserttík kesh óttí.
Mereıtoıda Júrsín Ermannyń aıtysker shákírtterí Toyota Camry 80 kólígín míngízdí.
Ís-shara barysynda Almaty qalasynyń ákímí Darhan Satybaldy Qazaqstan Respublıkasynyń Prezıdentí Qasym-Jomart Toqaevtyń qūttyqtau hatyn oqyp, Memleket basshysynyń Jarlyǵymen Júrsín Ermanǵa "Qazaqstannyń halyq jazushysy" qūrmettí ataǵy berílgenín habarlady.
Halqymyz Sízdí bedeldí qoǵam qaıratkerí árí talantty publıtsıst retínde jaqsy bíledí jáne qūrmetteıdí. Aıtys ónerín jańǵyrtuǵa qosqan úlesíńíz aıryqsha. El bírlígí men halyqtar dostyǵyn arqau etken shyǵarmalaryńyz oqyrmanǵa jaqyn árí túsíníktí. Sízge zor densaulyq pen shyǵarmashylyq tabys tíleımín, – delíngen Prezıdent qūttyqtauynda.
Merekelík keshke aqyn-jazushylar, qoǵam qaıratkerlerí, mádenıet ókílderí jáne ónersúıer qauym qatysty.
Baǵdarlama ayasynda aqynnyń ómírí men shyǵarmashylyǵyna arnalǵan derektí fılm kórsetílíp, jyrlary oqyldy, sahnalyq qoıylymdar ūsynyldy. Shákírtterí men ízbasarlary ūstazyna óleń arnap, qūrmet kórsettí.
