Amerıkalyq Pew Research Center zertteý ortalyǵy musylmandardyń álemdegi eń jyldam ósip kele jatqan dinı top ekenin málimdedi.
Kúlli álem boıynsha musylman qarasy 2010 jyldan 2020 jylǵa deıin 347 mıllıon adamǵa artqan, dep habarlaıdy aqshamnews.kz.
Atalmysh uıym 2700 derek kózden alynǵan (halyq sanaǵy, resmı jazbalar jáne 2010 jyldan 2020 jylǵa deıin 201 elde júrgizilgen áleýmettik saýalnamalar) málimetterdi taldaı kele óz esebin jarıalady. Bul málimette, sondaı-aq, saýalnamaǵa tartylǵandardyń dinı senimi týraly suraqtarǵa bergen jaýaptary da eskerilgen. Esepke sáıkes álemde musylmandar sany 347 mıllıon adamǵa artty, bul kórsetkish barlyq dinder arasynda eń jyldam ósimdi bildiretin kórsetkish. Buǵan negizinen ıslam qoǵamyndaǵy musylman elderiniń tabıǵı jolmen ósýi sebep boldy. Salystyrý úshin salsaq, hrıstıandar sany 122 mıllıon adamǵa artqan, alaıda, olardyń álem boıynsha úlesi azaıyp keledi. Esepte hrıstıandardyń úlesiniń 1,8% -ǵa tómendeýi negizinde hrıstıandardyń óz senimderinen bas tartýymen baılanysty ekeni aıtylǵan.
Osylaısha, musylmandardyń adamzat sanyndaǵy úlesi 2010 jyly 23,9%-dan 2020 jyly 25,6%-ǵa ósti, al hrıstıan úlesi bul aralyqta 30,6%-dan 28,8%-ǵa tómendedi. Hrıstıandar sanynyń eń kóp tómendeýi Eýropa men Soltústik Amerıkada oryn alǵan. Esepte musylmandardyń negizinen Azıa, Tynyq muhıty aımaǵy, Taıaý Shyǵys jáne Soltústik Afrıkada turatyny kórsetilgen. Sonymen qatar, Soltústik Amerıkada musylmandar sany 52,3%-ǵa, Saharadan ońtústik qaraı Afrıka elderinde 33,8%-ǵa, Taıaý Shyǵys pen Soltústik Afrıkada 23,9%-ǵa artty. Bul merzimde Soltústik Amerıkada hrıstıandar sany 10,8%-ǵa, Eýropada 8,8%-ǵa qysqardy, esesine Sahara shóliniń ońtústigin jaılaǵan Afrıka elderinde 31,2%-ǵa ósti. Al ateıserge kelsek, bul sanattaǵy adamdar adamzattyń 24,2%-n qurap, hrıstıan jáne musylmandardan keıingi úshinshi kópshilik topty qurap otyr.
Budan ózge, esepte 2020 jyly býddıster sany 2010 jylmen salystyrǵanda 19 mıllıonǵa azaıǵany, al evreıler sany 6%-ǵa artyp, shamamen 15 mıllıon adamǵa jetkeni aıtylǵan. Pew Research 2017 jylǵy zertteý nátıjesinde ıslam álemdegi eń jyldam ósetin din ekeni jáne 2075 jylǵa deıin ıslam álemdegi eń iri dinge aınalýy múmkin ekeni boljanǵan.