Almatyda 2026 jyldan bastap būryn saqtandyrylmaǵan 60 myńnan astam tūrǵyn jergílíktí byudjet esebínen míndettí áleumettík medıtsınalyq saqtandyru (MÁMS) júıesíne qosylady.
Óńírlík kommunıkatsıyalar qyzmetínde «Áleumettík medıtsınalyq saqtandyru qory» KEAQ Almaty qalalyq fılıalynyń dırektory Mūhamedjan Ílıyas osylaı dep málímdedí.
Onyń aıtuynsha, qazír Almatyda shamamen 2,3 mln adam tūrsa, olardyń 1,9 mıllıony (82%) saqtandyrylǵan mártebege ıe eken. Qala tūrǵyndarynyń shamamen 444 myńy qazír osy MÁMS júıesínen tys qalǵan.
«Saqtandyrylmaǵandardyń qatarynda D men E sanatyna jatatyn, yaǵnı jaǵdaıy qıyn jáne shūǵyl deńgeıdegí azamattar bar. Būlar ómírínde qıyndyq bolyp jatqan shamamen 95 myń qala tūrǵyny. Olardyń tabysy joq, bolsa da óte tómen, kúnkórísíne jetpeıdí, sondyqtan olar memlekettíń qoldauyna qatty mūqtaj», – deıdí ol.
2026 jyly osy sanattaǵy medıtsınalyq kómektí tūraqty paıdalanatyn 34 myń adam úshín MÁMS jarnasyn jergílíktí byudjetten tóleı bastamaq. Sonymen qatar, resmı túrde tírkelgen 28 myń jūmyssyz azamat úshín de jarnany jergílíktí byudjet esebínen tóleıdí.
«Esepke qaraǵanda, 2026 jyly atalǵan sanattaǵy adamdarǵa jarna tóleuge ketetín shyǵyn 6,9 mlrd teńgeden asady. Bír adamǵa aı saıynǵy jarna – 9189 teńge. Būl rette osy sanattaǵy barlyq azamat avtomatty túrde saqtandyrylyp, jarnalar medıtsınalyq kómekke naqty júgíngen jandarǵa tólenedí», – dedí Mūhamedjan Ílıyas.
Keler jylǵa qańtardan bastap osy sanattaǵy tūrǵyndarǵa MÁMS júıesínde dárígerlík kómek aluǵa qūqyǵyn rastaıtyn SMS-habarlama kele bastaıdy.