Aýyl sharýashylyǵy vıse-mınıstri Erbol Tasjúrekov jáne agrarlyq joǵary oqý oryndarynyń basshylary, ǵylymı-zertteý ınstıtýttarynyń jetekshileri jáne salalyq sarapshylardyń qatysýymen ótken strategıalyq sesıada «Ulttyq agrarlyq ǵylymı-bilim berý ortalyǵy» KEAQ-tyń damý basymdyqtary men qadamdary naqtylandy, - dep habarlaıdy Aqshamnews.kz.
İs-shara barysynda qatysýshylar biryńǵaı agrotehnologıalyq ekojúıe qalyptastyrý tetikterin, Ortalyqtyń mısıasy men paıymyn jańartý jónindegi usynystardy, sondaı-aq bilim, ǵylym jáne óndiristi ıntegrasıalaýǵa negizdelgen 2030 jylǵa deıingi jańa strategıalyq damý baǵyttaryn talqylady.
Aýyl sharýashylyǵy salasynyń aldynda tehnologıalyq jańǵyrtý, ónimdilikti arttyrý jáne azyq-túlik qaýipsizdigin qamtamasyz etý boıynsha aýqymdy mindetter turǵany atap ótildi. Bul mindetterdiń oryndalýy kadrlar daıarlaý deńgeıine, qoldanbaly ǵylymnyń damýyna jáne zamanaýı agrotehnologıalardy naqty óndiriste tıimdi engizýge tikeleı baılanysty.
Ortalyqtyń ustanymy «salanyń suranysy — ǵylymı zertteýler — kadrlar — engizý» atty tutas tizbekti qalyptastyrýǵa, dýaldy jáne tájirıbege baǵyttalǵan oqytýdy kúsheıtýge, tájirıbelik stansıalardy damytýǵa jáne tehnologıalar transfertiniń tıimdiligin arttyrýǵa negizdelgen.
Aıta keteıik, UAǴBO qurylymyna 33 enshiles uıym kiredi, onyń ishinde 3 agrarlyq joǵary oqý orny, 12 ǵylymı-zertteý ınstıtýty jáne 16 aýyl sharýashylyǵy tájirıbelik stansıasy bar. Mundaı keń jeli seleksıa men ǵylymı zertteýlerden bastap tuqym materıalyn aýqymdy kólemde óndirýge deıingi tolyq sıkldi qamtýǵa múmkindik beredi.
2025 jyly jalpy kólemi shamamen 106 myń gektarǵa jýyq aýyl sharýashylyǵy daqyldary egildi. Onyń ishinde dándi jáne burshaq daqyldary — shamamen 70 myń gektardy, maıly daqyldar — 20 myń gektardy, mal azyqtyq daqyldar — 17 myń gektardy qurady. Ǵylymı egistik alqaptar aıtarlyqtaı keńeıtildi.
Otandyq tuqym materıalyn óndirýge erekshe nazar aýdaryldy. Nátıjesinde qazaqstandyq seleksıa sorttarynyń egis alqaptary 11 myń gektardan astamǵa ulǵaıyp, jalpy ónim kólemi 9 myń tonnaǵa artty.
Negizgi jetistikterdiń biri - UAǴBO júıesinde qurylǵan «Qazaq Tuqym» jáne «Ońtústik» konsorsıýmy tarapynan joǵary sanatty tuqym óndirý boldy. 2025 jyly konsorsıým 60 myń tonnadan astam sýperelıtalyq, elıtalyq jáne joǵary reprodýksıaly tuqym óndirdi.
Búginde enshiles uıymdar elimizdiń ártúrli topyraq-klımattyq aımaqtaryna beıimdelgen otandyq seleksıanyń 236 básekege qabiletti sortynyń tuqymyn usynýda. Olardyń qatarynda túpnusqa (sýperelıtalyq), elıtalyq jáne joǵary reprodýksıaly tuqymdar bar.
Sarapshylardyń pikirinshe, tuqym sharýashylyǵyn damytý — azyq-túlik táýelsizdiginiń berik negizi. Sapaly sýperelıtalyq jáne elıtalyq tuqymdar ónimniń turaqtylyǵyn qamtamasyz etip, ónimdilikti arttyrýǵa jáne ımportqa táýeldilikti azaıtýǵa múmkindik beredi.
Salanyń syn-qaterlerine jaýap berý maqsatynda UAǴBO kezeń-kezeńimen agrotehnologıalyq habqa transformasıalanýda. Jańa format ǵylymdy, bilim berýdi, óndiris pen bıznesti bir alańda toǵystyra otyryp, jańa býyn kadrlaryn daıarlaý, qoldanbaly ázirlemeler jasaý jáne ozyq agrotehnologıalardy engizý ortalyǵyna aınalýy tıis.
Strategıalyq sesıa qorytyndysy boıynsha vıse-mınıstr UAǴBO-nyń 2030 jylǵa deıingi damý strategıasyn ózektendirýdi jáne transformasıalaý jónindegi Jol kartasyn ázirleýdi tapsyrdy.