Aqsaı shatqalyndaǵy tabıǵı órtti 150-den astam adam men tikushaq sóndirip jatyr, dep habarlaıdy Aqshamnews.kz Tótenshe jaǵdaılar mınıstrliginiń baspasóz qyzmetine silteme jasap.
«Órt Almaty oblysy Qarasaı aýdanyndaǵy Kóklaısaı saıajaılary mańynda tutanǵan. Qazirgi tańda órt aýmaǵy naqtylanyp jatyr. Qaza tapqandar men zardap shekkender joq. Jaqyn mańdaǵy saıajaı turǵyndary aldyn ala óz erikterimen evakýasıalanǵan. Qazir órttiń turǵyn úıler men oǵan jaqyn aýmaqtarǵa taralý qaýpi joıyldy. Oqıǵa ornyna Almaty oblystyq TJD, Almaty qalasynyń TJD, TJM-niń №28237 áskerı bólimi jáne memlekettik ulttyq tabıǵı park qyzmetkerleri jumyldyryldy. Barlyǵy 150-den astam adam men 20 tehnıka birligi jumys isteýde», – delingen jeksenbi kúni taratylǵan habarlamada.
Vedomstvonyń málimetinshe, órtti sóndirýdi jer bederiniń kúrdeliligi men aýa raıy qıyndatyp otyr. Soǵan qaramastan, órtti tolyqtaı joıý jumystary jalǵasyp jatyr.
«Qosymsha retinde QR TJM-niń “Qazavıaqutqarý” AQ-yna tıesili sý shashýǵa arnalǵan qurylǵysy bar Mı-8 tikushaǵy tartyldy», – delingen habarlamada.