Eldegí eń qart tūrǵyn ūlytaulyq Túımegúl Temírbaeva 116-shy kóktemín qarsy aldy. Keıuana álí de shıraq. Ol kóp jasaudyń syryn adal eńbek jáne jaqsy nıetpen baılanystyrady, – dep habarlaıdy aqshamnews.kz tílshísí "Habar 24" arnasyna sílteme jasap.
Ómír boıy auyr jūmystyń ortasynda júrgen ol qazír de bos otyrmaıdy. Qūrt jaıyp, úı tírlígíne aralasyp tūrady. Árkímníń peshenesíne jazyla bermeıtín ádemí qartayu baqyty Túımegúl apaǵa būıyrǵan. Ol jūbaıy Ayazbaı Temírbaev ekeuí ómír boıy jylqy baqqan. Degenmen mal sońyndaǵy qara jūmystan qajymaǵan. Ayazbaı aqsaqal ǵasyrǵa juyq jasap, 95 jasynda dúnıeden ótken. Al jaqynda 116 jasqa tolǵan Túımegúl áje kózáıneksíz ıne sabaqtap, ís tígedí. Qımyly da shıraq.
"100-den asyp bara jatyrmyn. Ólmeı kele jatyrmyn. Balalarym aman bolsyn. Balalardyń aldynda ketsem dep júrmín", – dedí Qazaqstandaǵy eń qart adam Túımegúl Temírbaeva.
Túımegúl ájeníń balalary "Osy kúnge sheıín ol kísíníń "auyrdym" degenín estímedík" deıdí. Es bílgennen eńbekpen ósken jan qazír de qartaıdym dep qarap otyrǵan joq. Nemerelerdíń qarsylyǵyna qaramaı, úıdíń tírlígíne de aralasady.
"Anda-sanda dalaǵa shyǵyp keledí. Kóbínese úıde júredí. Bıyl solaı boldy. Oǵan deıín barlyq sharuaǵa jarap tūrǵan. Syrttyń sharuasyna, íshtíń sharuasyna. Qansha degenmen jasy keldí ǵoı. Teledıdar kóríp otyrady. Bízge tamaq ístep qoyady", – dedí ájeıdíń kelíní Raushan Temírbaeva.
Túımegúl Temírbaeva qańtarda 116 jasqa toldy. Onyń eldegí eń qart tūrǵyn ekenín Eńbek jáne halyqty áleumettík qorǵau mınıstrlígí rastaǵan. Keıuana búgínde Qyzyljar kentínde kenje ūlynyń qolynda tūrady. Bauyrynan órgen 4 baladan 15 nemere, 25 shóbere súıgen.
