Алматы қаласында 19 сәуір күні Жамбыл атындағы Қазақ мемлекеттік филармониясы сахнасында «Зулейха» спектаклінің 1 жылдық мерекелік көрсетілімі өтеді, – деп хабарлайды aqshamnews.kz тілшісі.
Әлемнің бірнеше тіліне аударылып, халықаралық деңгейде кеңінен танылған Гузель Яхинаның «Зулейха открывает глаза» романы алғаш рет қазақ сахнасында қойылып, көрерменнің ерекше ықыласына ие болды. Бір жыл ішінде спектакль театр сүйер қауым арасында резонанс тудырып, заманауи қазақ театрының маңызды мәдени оқиғаларының біріне айналды. «Зулейха» – театр және кино актрисасы, әнші Салтанат Бақаеваның продюсер ретіндегі алғашқы жобасы. Бұл қойылым – оның шығармашылық жолындағы жаңа белес әрі батыл эксперимент.
Спектакль туралы
«Зулейха» — тозақта туған махаббат жайлы терең драмалық хикая.
Қойылым бас кейіпкердің үрей мен қорқынышқа толы әлемде күйеуінен, үйінен, өткенінен айырылған сәтінен басталады. Зулейха үшін өмір түрмеге айналады. Алайда дәл осы қатыгездік пен үмітсіздік ортасында ол алғаш рет еркіндікті, нәзік әрі алапат махаббатты сезінеді.
«Зулейха көзін ашады... Ал сіз ше?»
Шығармашылық топ
− Автор – Гузель Яхина
− Режиссер – Әлібек Өмірбекұлы
− Киім суретшісі – Арман Теміртас
− Продюсер – Салтанат Бақаева
Актерлік құрам
− Зулейха – Салтанат Бақаева
− Упыриха, Игнатов – Азамат Сатыбалды
− Муртаза – Бекжан Тұрыс
− Юсуф – Рауан Ахмедов
Сахнада Қазақстанның еңбек сіңірген қайраткерлері Бекжан Тұрыс пен Азамат Сатыбалды өнер көрсетеді. Әсіресе, бір спектакльде екі түрлі мінезді кейіпкерді қатар алып шығатын Азамат Сатыбалдының ойыны кәсіби шеберліктің жоғары деңгейін айқындайды. Жас актер Рауан Ахмедов үшін бұл – театр сахнасындағы алғашқы қадам. Ал басты рөлді сомдаған Салтанат Бақаева үшін жоба актерлік пен продюсерлікті қатар алып жүрген шығармашылық ізденістің нәтижесі.