Мемлекет басшысы Қасым-Жомарт Тоқаевтың сапалы әрі рухани-танымдық мазмұны терең кино түсіру туралы тапсырмасына сәйкес жүзеге асырылып келе жатқан жыл сайынғы киножобалар конкурсы басталды, деп хабарлайды Aqshamnews.kz тілшісі.
Бұл туралы Аида Балаева мәлімдеді.
Іріктеудің басым бағыттары Ұлттық киноны қолдау мемлекеттік орталығының ресми сайтында жарияланған. Биыл конкурс аясында туған жер, отбасы, салауатты өмір салты, ұлттық құндылықтар, еңбек, заң мен тәртіп, табиғат, ғарыш, туризм және өзге де өзекті тақырыптар ұсынылып отыр.
Биылғы байқаудың басты жаңалықтарының бірі – іріктеу процесіне жасанды интеллект технологиясының енгізілуі. Бұл қадам конкурс өткізу барысының ашықтығын арттырып, шешім қабылдаудағы әділдікті қамтамасыз етуге бағытталған.
Ережеге сәйкес, бірінші кезеңде тек сценарийлер мен сценарий жоспарлары қабылданады. Екінші кезеңде ұсынылған құжаттар топтамасының толықтығы мен талаптарға сәйкестігі тексеріледі. Ал ашық қорғау және питчинг кезеңі онлайн көрсетілім форматында өтеді.
Айта кетейік, ашықтық пен әділдік қағидаттары негізінде өткен конкурстардың нәтижесінде мемлекеттік қолдау алған жобалардың 70 пайызы жас режиссерлердің жұмыстары болған.
Ұйымдастырушылар мазмұнды әрі сапалы фильм түсіруге ниетті авторларға сәттілік тіледі.
