Алматы қаласында терроризм мен экстремизмнің алдын алу бағытында маңызды кездесу ұйымдастырылды. Жас ұрпақтың санасын теріс идеологиялардан қорғау, құқықтық сауаттылығын арттыру және діни танымын дұрыс қалыптастыру мақсатында 10–11 сынып оқушыларымен арнайы лекция өткізілді.
Кездесуге ақпараттық-түсіндіру тобының мүшесі, исламтанушы Мырзабаев Нұрлан арнайы қатысып, оқушылармен мазмұнды сұхбат құрды.
Лекция барысында маман экстремизм, терроризм және радикализм ұғымдарына кеңінен тоқталды.
Экстремизм – қоғамдағы тұрақтылықты бұзуға, конституциялық құрылымды өзгертуге бағытталған шектен шыққан көзқарастар мен әрекеттер.
Терроризм – қорқыту, күш көрсету, зорлық-зомбылық жасау арқылы саяси немесе діни мақсатқа жетуді көздейтін қылмыстық іс-әрекет.
Радикализм – белгілі бір идеяны түбегейлі, ымырасыз түрде қолдап, оны күшпен жүзеге асыруға ұмтылатын көзқарас.
Нұрлан Мурзабаев өз сөзінде жастардың интернет желісіндегі күмәнді ақпараттарға сын көзбен қарауы, діни мәліметтерді тек ресми және сенімді дереккөздерден алуы керектігін атап өтті. Сонымен қатар, дәстүрлі дін мен теріс ағымдардың айырмашылығын түсіндіріп, ұлттық құндылықтар мен зайырлы қоғам қағидаттарының маңыздылығына тоқталды.
Кездесу барысында оқушылар өздерін толғандырған сұрақтарын қойып, ашық пікір алмасты. Әсіресе әлеуметтік желілердегі радикалды идеологиялардың таралу жолдары мен одан сақтану тәсілдері кеңінен талқыланды.
Іс-шараның басты мақсаты – жасөспірімдердің құқықтық және діни сауатын арттыру, олардың сыни ойлау қабілетін дамыту және қоғамдағы тұрақтылық пен келісімді нығайтуға үлес қосу болды.
Осындай ақпараттық-түсіндіру кездесулері жастардың теріс ағымдардың ықпалына түспеуіне, саналы әрі жауапты азамат болып қалыптасуына оң әсерін тигізері сөзсіз.