Жетісу облысында төрт жасар ұлын батареяға байлап, аяусыз ұрған 28 жастағы әйелге қатысты істің шешімі шықты. Анасы қылмыстық жауапкершіліктен босатылды, сот оны есі дұрыс емес деп таныды, – деп хабарлайды aqshamnews.kz тілшісі.
Оқиға бір ай бұрын Жаркентте болған. Төрт жасар бала ваннадағы суды өшіруді ұмытып кеткен соң, әйел оны жазаламақ болған. Анасы баланы батареяға байлап, жұдырықпен, аяқпен және ожаумен ұрған.
Оқиғаны отбасының танысы әкесінің өтінішімен телефонға түсірген. Кейін ер адам жұбайын полицияға тапсырған. Ал 4 және 2 жастағы екі бала Талдықорғандағы Отбасын қолдау орталығына жеткізілген.
Сот-психиатриялық сараптама қорытындысы бойынша, әйелдің ақыл-ой кемістігі бар екені және өз әрекетінің қауіптілігін толық түсіне алмағаны анықталған. Осыған байланысты ол мәжбүрлі емдеуге жіберілді.
«Сараптама нәтижесінде сотталушы әрекет жасаған кезеңде өз іс-әрекетінің нақты сипатын және қоғамдық қауіптілігін ұғына алмағаны анықталды. Осыны ескере отырып, сот оны қылмыстық жауапкершіліктен босатып, жалпы типтегі психиатриялық стационарда мәжбүрлеп емдеу түріндегі медициналық сипаттағы мәжбүрлеу шараларын қолданды», – деді Жетісу облыстық сотының баспасөз хатшысы Нұрсұлтан Орынбасаров.
Еске салайық, 18 қаңтарда кешке желіде балаға қатыгездік көрсетілген видео тараған болатын. Кейін Жетісу облысының полициясы әйелді ұстады. ҚР Оқу-ағарту министрлігі Балалардың құқықтарын қорғау комитеті анасы ата-ана құқығынан айырылуы мүмкін екенін хабарлаған.
Сондай-ақ күдіктіге қатысты қамауда ұстау түріндегі бұлтартпау шарасы таңдалып, сот-психиатриялық сараптама бірқатар сараптамалар тағайындалғаны айтылды.