Алматыда кейінгі күндері жол қозғалысы ережесін өрескел бұзу фактілері жиілеп, қауіпті жүргізу мен түнгі жарыстар деректері тіркелді, – деп хабарлайды aqshamnews.kz тілшісі.
Алматыда жол қозғалысы ережесін бұзу деректері артқан. Ресми мәліметке сәйкес, соңғы үш күннің өзінде қала көшелерінде 5 мыңнан астам құқық бұзушылық анықталған.
Полицияның хабарлауынша, мас күйде және есірткі әсерімен көлік басқарған 43 жүргізуші ұсталып, барлығы да рөлге отыру құқығынан шеттетілген. Сонымен қатар 369 адам көлікті құжатсыз басқарған. Арнайы айып тұрағына 94 автокөлік қойылған.
Алматы қалалық полиция департаменті жолдағы жағдайды тұрақтандыру және құқық бұзушылықтардың алдын алу мақсатында нүктелік рейдтік шаралар жүргізіліп жатқанын мәлімдеді.
Сондай-ақ қауіпті жүргізу, түнгі жарыс ұйымдастыру деректері тоқтатылып, жылдамдықты шектен тыс асырудың 2 мыңнан астам фактісі тіркелген.
Құқық қорғау органдарының мәліметінше, кейбір жүргізушілер өздерінің жол ережесін бұзған сәттерін видеоға түсіріп, әлеуметтік желіде жариялайды. Алайда мұндай жағдайлардың барлығы полицияның бақылауында.
Мәселен, Әл-Фараби даңғылында автокөлікті сағатына 250 шақырымға дейін үдеткен жүргізушінің жеке басы анықталып, сот шешімімен 10 тәулікке қамауға алынған.
Еске салайық, бұған дейін Алматыда үш адам қаза тапқан жантүршігерлік жол апаты болған еді. Тараған мәліметтерге сәйкес, қайғылы оқиғаға дейін жарыс болғаны айтылған. Аталған дерек қоғамда үлкен резонанс тудырып, қылмыстық іс қозғалды.