Жастардың заңдарды, өз құқығын білуі, сол арқылы өзінің де, жақындарының да қауіпсіздігін қамтамасыз ете алуы маңызды.
Алматы технология және флористика колледжінің тәрбие бөлімі басшысы Жанар Ахмеджанованың ұйымдастырумен «Заң және біз» деген тақырыпта танымдық іс-шара өтті, деп хабарлайды aqshamnews.kz.
Оған Алматы қаласы Қылмыстық-атқару жүйесі департаментіне қарасы №11 мекеменің қызметкерлері – режим және күзет бөлімінің бақылаушысы әділет сержанты Азамат Молдабек және Жеңісхан Еркегүл қатысты. Кездесу барысында балалар колониясының қызметкерлер жеткіншектерге заңдар, олардың артықшылықтары, қоғамдағы орны туралы айтты. Студенттер қойған сұрақтарға жауап берді.
– Кездесудің мақсаты – жас ұрпаққа құқықтық жауапкершіліктің маңыздылығын насихаттау. Сондай-ақ, құқықтық тәрбие туралы тарқатып, кәмелетке толмағандар арасында заң ұғымдарын насихаттай отырып, білімін жетілдіру, жасөспірімдердің жамандыққа ұрынып қалмай, қауіпсіз ортаны өздері де қалыптастыра алатынын түсіндіру. Бұл кездесуден біз жастардың санасы сергек, ойлы, зерек екенін байқадық. Ал біз өз кезегімізде оларға үнемі қолдау көрсетуге дайын екендігімізді білдірдік, – дейді №11 мекеменің өкілі Еркегүл Жеңісхан.