2026 жылғы 14 сәуірде Мимар Синан өнер университетінде көрнекті қазақ археолог, профессор Айман Досымбаеваға арналған халықаралық ғылыми-мәдени іс-шара өтті, – деп хабарлайды aqshamnews.kz тілшісі.
Аталмыш іс-шара Қазақстан Республикасының Ыстанбұлдағы Бас консулдығының қолдауымен, Түркі тарихы және мәдениеті қоры (TÜRKTAV) және Мимар Синан өнер университетінің Еуразия мәдениет және өнерді зерттеу орталығының ұйымдастыруымен өтті.
Іс-шара аясында «Дәуірлер үні: Айман Досымбаеваның Жайсан және Мерке археологиялық мұрасы» атты көрменің ашылуы өтті. Көрме Жайсан мен Мерке археологиялық нысандары арқылы ғалымның ғылыми еңбектерін, далалық зерттеулерін және түркі өркениетіне қосқан үлесін кеңінен таныстырды. Айман Досымбаева және Нұрболат Бөгенбайдың «Жайсан - Шу өзені түріктерінің киелі жері» атты түрік тіліндегі кітабының тұсаукесері мен панель отырысы ұйымдастырылды. Жиынға Мимар Синан өнер университетінің ректоры профессор Ахмет Саджит Ачыкгёзоғлу, Қазақстан Республикасының Ыстанбұлдағы Бас консулы Нуриддин Аманқұл, университеттің әдебиет факультеті деканы, профессор Ханифе Конджу, Түркияның Әділет және даму партиясының (АК партиясы) Түркі мемлекеттерімен байланыстар жөніндегі төрағасының орынбасары доктор Решиде Юксель, Дүниежүзі қазақтары қауымдастығының Түркиядағы өкілі және Халықаралық Дінмұхамед Қонаев қорының басқарма мүшесі Ержан Уәйіс, ғалымдар қатысты.
Панель отырысында профессор Ахмет Ташагыл, доктор Фетхи Ахмет Йүксел, доктор Нұрболат Бөгенбай және доктор Серхан Чынар баяндама жасап, Айман Досымбаеваның ғылыми мұрасы, түркі әлемінің археологиясы мен мәдени байланыстары жан-жақты талқыланды.