Алматы қаласындағы Алматы облыстық орталық әмбебап кітапханасында жазушы Ырысбек Дәбейдің «Тұманды қараша. Ай сонатасы» атты жаңа кітабының тұсаукесер кеші өтті. Бұл туралы Aqshamnews.kz сайты хабарлайды.
Әдеби кешке белгілі қаламгерлер, жас жазушылар, БАҚ өкілдері және әдебиетсүйер қауым қатысты. Жаңа жинаққа автордың соңғы жылдары жазған әңгімелері мен «Тұманды қараша. Ай сонатасы» хикаяты енген. Бұл шығармалар бұған дейін оқырмандардың жоғары бағасына ие болып, республикалық және халықаралық әдеби бәйгелерде жүлделі орындарға ие болған.
Кеш барысында ҚР Жазушылар одағының мүшесі, "Ақжелкен" журналының бас редакторы ақын Есей Жеңісұлы, Мемлекеттік «Дарын» жастар сыйлығының лауреаты ақын Ақберен Елгезек, "Ана тілі" газетінің бас редакторы ақын Ерлан Жүніс, сондай-ақ Алматы облыстық орталық әмбебап кітапханасының директоры Ғалия Сламбайқызы мен кітаптың редакторы Санжар Бекжан туындының тұсауын кесіп, жазушының шығармашылығына жоғары баға берді.
Айта кетейік, «Тұманды қараша. Ай сонатасы» жинағы «Steppe & World Publishing» баспасынан жарық көрді. Бұл баспа заманауи қазақ әдебиетінің дамуына зор үлес қосып келе жатқан белді баспалардың бірі.
Ырысбек Дәбейдің бұл жаңа кітабы қазіргі қазақ әдебиетіндегі маңызды туындылардың бірі боларына сенім мол.