Алматыдағы UIB университетінде вебтундар жасауға арналған дәрістер мен воркшоптар өтуде
Алматы қаласы Жастар саясаты басқармасының қолдауымен Халықаралық Бизнес Университетінде (UIB) қазіргі цифрлық креативті индустрияның ең перспективалы бағыттарының бірі — вебтундарға арналған ашық дәрістер сериясы басталды, деп хабарлайды aqshamnews.kz
Вебтундар — смартфон арқылы тік бағытта оқуға ыңғайланып жасалған цифрлық комикстер. Олар иллюстрацияны, сторителлинг пен анимация элементтерін біріктіреді, бүгінде бүкіл әлемде танымал және креативті индустрияның бір бөлігіне айналуда.
Бұл формат Оңтүстік Корея, АҚШ, Жапония сияқты елдерде кең танымалдыққа ие болып үлгерсе, енді Қазақстанда да білім беру және мәдени жобаларға белсенді түрде енгізілуде. UIB-дің жаңа білім беру бастамасы студенттерді осы саланың мүмкіндіктерімен таныстыруды көздейді — көркемдік және сценарийлік шеберліктен бастап, халықаралық цифрлық платформаларда контентті ілгерілету мен коммерциялауға дейін.
«Біз жай ғана курс емес, тұтас кешенді жұмысты бастадық. Онда индустрия өкілдерімен, суретшілермен, сценаристермен және платформалармен кездесулер өтеді. Вебтун — бұл жай сурет салу ғана емес. Бұл — нарратив, маркетинг, мәдениет және идеяны экспорттау», — дейді жоба ұйымдастырушылары.
Шақырылған спикерлер қатарында Оңтүстік Корея, Қазақстан және Өзбекстаннан келген жетекші мамандар, сондай-ақ танымал веб-платформалардың өкілдері бар. Бір ай ішінде қатысушылар дәрістер тыңдап, панельдік сессияларға қатысады, ал соңында өз вебтунының пилоттық эпизодын жасау бойынша воркшопқа қатыса алады.
Аталған жоба — жастар арасында цифрлық және креативті мамандықтарды дамытуға бағытталған ауқымды бағдарламаның бір бөлігі.