Әйгілі америкалық жұлдызды топ Backstreet Boys Алматыда Орталық стадионда өнер көрсетеді. Дәл қазіргі атмосфера қандай? Aqshamnews.kz тілшісінің материалында.
Түрлі елден келген жанкүйерлер стадион маңына жиналып жатыр
Жанкүйерлер концерт басталмай жатып, жиналып үлгерген. Олар сүйікті әншілерін асыға күтіп, ерекше көңіл-күйде жүргендерін жеткізді. Көпшілігі сүйікті топтарының логотипі бар мерч киіп, әндерінің сөздерін бірге айтып, естелік суреттерге түсіп жатыр.
Дайындық қалай?
Жиында еріктілердің жұмысына да арнайы тоқталды. Қалалық жастар саясаты басқармасының басшысы Азиз Қажденбектің айтуынша, концертке 200-ге жуық ерікті тартылады. Олар тек 18 жастан асқан жастардан іріктеледі, әрқайсысына тегін тамақтану талондары беріледі.
Полиция ескертуі
Концертте қоғамдық тәртіп ескерусіз қалмайды. Алматы қалалық полиция департаментінің мәліметінше, Backstreet Boys тобының концерті кезінде қоғамдық тәртіп пен жол қауіпсіздігін қамтамасыз етуге шамамен 2,5 мың полиция қызметкері жұмылдырылады.
Мерекелік кешке келушілер саны көп болғандықтан, полицияның кешенді күштерінің кезекшілігі күшейтіледі. Әсіресе қоғамдық тәртіпті сақтау, құқықбұзушылықтардың алдын алу және көлік ағынын реттеуге ерекше көңіл бөлінеді. Арнайы көліктердің кедергісіз өтуін қамтамасыз ету және кептелістердің алдын алу мақсатында Абай даңғылы – Байтұрсынов, Мұқанов және Сәтпаев көшелерінің шекарасындағы көлік қозғалысы ішінара шектелуі мүмкін.
Алматы қалалық полиция департаменті қала тұрғындарын осы ақпаратты маршрут жоспарлау кезінде ескеруге, қоғамдық тәртіпті сақтауға және полиция қызметкерлерінің нұсқауларына құлақ асуға шақырды.
Іс-шара өтетін жерде өрт қауіпсіздігін Алматы гарнизонының екі өрт сөндіру бөлімінің күші мен техникасы қамтамасыз етеді. Сондай-ақ, Департамент басшылығы – Мемлекеттік өрт бақылау басқармасының бастығы Канин К.Л. және Бостандық ауданының ТЖ басқармасы бастығы Елебеков Е.С. бақылауды жүзеге асырады.