Алматыда түнгі уақытта қауіпті жарыс ұйымдастыратын жүргізушілер көбейген. Осыған байланысты полиция жол қозғалысы ережесін бұзғандарға қолданылатын жаза түрлерін еске салды, – деп хабарлайды aqshamnews.kz тілшісі.
Алматыда кейінгі уақытта жүргізушілердің түнгі жарыс ұйымдастыру фактілері жиілеген. Қалалық полиция департаментінің мәліметінше, осыған байланысты жолдарда жергілікті рейдтік іс-шаралар жүргізіліп жатыр.
Тек кейінгі үш күннің өзінде қала көшелерінде жол қозғалысы ережесін бұзудың 5 мыңнан астам дерегі анықталған. Көлікті мас күйде немесе есірткіге масаң күйде басқарған 43 жүргізуші ұсталып, барлығы да көлік басқару құқығынан шеттетілген. Сонымен қатар 369 адам көлікті тиісті құжатсыз тізгіндеген. Ал 94 автокөлік арнайы айыптұраққа қойылған.
Полиция қауіпті жүргізу деректері, соның ішінде түнгі жарыстар да тоқтатылғанын мәлімдеді. Бұдан бөлек, жылдамдықты шамадан тыс асырудың 2 мыңнан астам жағдайы тіркелген.
Тәртіп сақшыларының айтуынша, кейбір жүргізушілер жол ережесін бұзған сәтін әдейі видеоға түсіріп, әлеуметтік желіге жүктейді. Алайда мұндай әрбір жағдай бақылауға алынып, заң бұзушылар анықталып, жауапкершілікке тартылады.
Сондай резонансты оқиғалардың бірі әл-Фараби даңғылында болған. Онда жүргізуші көлігін сағатына 250 шақырымға дейін үдеткен. Полиция оның жеке басын жедел анықтап, ұстаған. Оған бірнеше әкімшілік құқық бұзушылық бойынша хаттама толтырылып, сот шешімімен 10 тәулікке әкімшілік қамауға алынған.
Полиция қауіпті жүргізу орны толмас салдарға әкелуі мүмкін екенін ескертіп, жүргізушілерді жол қозғалысы ережесін қатаң сақтауға шақырды.