Кеше Үкімет сағаты Ішкі істер министрлігінде өтті. Депутаттар ішкі істер министрі Ержан Сәденовке бірнеше сауал жолдады, - деп хабарлайды aqshamnews.kz тілшісі.
"1,5 млн камерамыз бар, 58 пайыз қылмыс ашылды деп оттырсыз. Қарапайым сұрақ: неге жоғалған, ұрланған смартфондар табылмайды? Бір жарым жыл болды, Есіл ауданы полиция бөлімшесінде менің арызым жатыр. Жарайды, мені қойшы, жалпы қарапайым халық смартфонын жоғалтып алады. Жай ғана телефонымызды таба алмай жатқанда, жоғары, жаһан мәселелерін айтқан қызық көрінеді екен", - деді Мәжіліс депутаты Самат Нұртаза.
Самат Нұртазаның өкпе-назын әріптестері де жалғап кетті. Мәжілісмен Бақытжан Базарбек Ақтөбеде жәбірленушіден миллион теңге сұраған полицей мен Шымкентте боди-массаж студиясын қанатының астына алып қорғаштаған тәртіп сақшасын мысалға келтірді.
"Халықтың полицейлерге деген сенімін арттырамыз деп, біз мында шапқылап жүргенде, өңірлерде түрлі масқараны көріп жатырмыз. Мәселен, Жетісу облысында заттай дәлел болған 24 миллион теңгені тәртіп сақшысы қолды қылған. Шымкент шаһарында полицейлер боди-массаж жасайтын жын-ойнақ салонды өздері билеп-төстеп, ешкім тимейтіндей қорғаштап жүріпті", - деді Мәжіліс депутаты Бақытжан Базарбек.
"Үзеңгілестерінің атына кір келтіріп, тұтас қазақ полициясын жаман атты қылатындармен әңгіме қысқа деген сөзін" бүгін министр Сәденов тағы қайталады. Айлық та 30 пайызға өсті, сондықтан артық қылтың-сылтыңды қойып, полицейдің бар назары жұмыста болуы керек.
Ержан Сәденов әріптестеріне погондағы жұлдыз саны өскен сайын, қызметтегі жалақысы да, лауазымы да жоғарылайды деді. Тек барлығына шыдам керек. Ал лауазымын асыра сілтеп пайдаланып, "полицей" деген атты кірлеткендер жұмыстан қуылады, қала берді жасаған тірлігіне өкінетін болады деді жауапты шенеунік.
