2025 жылғы сәуір айында Ұлттық қауіпсіздік комитеті прокуратура органдарымен бірлесіп, Астана қаласы мен Абай, Ақтөбе және Түркістан облыстарында діни радикалдардың заңға қайшы әрекеттерінің жолын кесті.
Терроризмді насихаттады және діни алауыздықты қоздырды деген күдікпен төрт Қазақстан азаматы ұсталды. Ұсталғандардың бірі бұрын сотты болған. Олар әлеуметтік желілер арқылы заңсыз әрекеттер жүргізген, деп хабарлайды aqshamnews.kz.
Тұрғылықты жерлерін тінту барысында заттай дәлелдемелер тәркіленді.
Аталған фактілер бойынша Қылмыстық кодекстің 174-бабы (әлеуметтік, ұлттық, рулық, нәсілдік, таптық немесе діни алауыздықты қоздыру) және 256-бабы (терроризмді насихаттау немесе терроризм актісін жасауға жария түрде шақыру) бойынша сотқа дейінгі тергеп-тексеру амалдары жүргізілуде.
Қылмыстық-процестік кодекстің 201-бабы 1-бөлігіне сәйкес, тергеу мүддесіне байланысты өзге ақпарат жария етуге жатпайды.
Сонымен қатар, бұрын тергелген істер бойынша сот Ақтөбе, Қарағанды және Түркістан облыстарының үш тұрғынына қатысты айыптау үкімін шығарды. Олар әлеуметтік желілерде және өз ортасында терроризм мен діни экстремизм идеологиясын таратқаны үшін жауапқа тартылды.