Дәрігер Никита Гурьянов есте сақтау қабілетінің не себепті әлсіреуі мүмкін екенін түсіндірді. Бұл туралы ол «Известия» басылымына берген сұхбатында айтты, – деп хабарлайды aqshamnews.kz тілшісі.
Маманның сөзінше, есте сақтаудың уақытша нашарлауы көбіне ағзаға оттегінің, дәрумендер мен пайдалы микроэлементтердің жетіспеуінен, қан айналымының баяулауынан, ұйқының бұзылуынан және кейбір дәрілерді ұзақ уақыт қабылдаудан болады.
Дәрігер кей жағдайда жадының әлсіреуі обструктивті апноэ синдромымен де байланысты болуы мүмкін екенін айтты. Мұндай кезде адам өзін үнемі шаршаңқы сезінеді, басы тұманданып жүргендей күй кешеді. Бірақ соған қарамастан, ұйқысында кінәрат барын өзі аңғармауы да мүмкін.
Сонымен қатар маман уақытша өзгерістер мен қауіпті белгілерді шатастырмау керегін ескертті. Оның айтуынша, егер ұмытшақтыққа қоса адамда бағдардан жаңылу, ештеңеге зауқы соқпау немесе мінез-құлқында өзгеріс байқалса, міндетті түрде дәрігерге қаралған жөн.
«Жадының нашарлауы әрдайым жас ұлғаюына байланысты қайтымсыз өзгеріс деген сөз емес. Кейде бұл – мидың дұрыс жұмыс істеуіне бір нәрсе кедергі келтіріп тұрғанының белгісі. Егер себебі дер кезінде анықталса, жағдайды түзетуге болады», – деді Гурьянов.