Д.Қонаевтың 111 жылдығы аталып өтті.
Мегаполисте мемлекет және қоғам қайраткері, үш мәрте Социалистік Еңбек Ері, дипломат, академик Дінмұхамед Ахметұлы Қонаевтың ескерткішіне гүл шоқтарын қою рәсімі өтті. Сондай-ақ, Д.А.Қонаевтың мемориалды пәтер-музейінде экскурсия ұйымдастырылды. Зиялы қауым өкілдері мемлекет және қоғам қайраткерінің өмірі мен мемлекеттік қызметі, оның еліміздің әлеуметтік-экономикалық, ғылыми әлеуетін дамытуға қосқан үлесі, кейбір саяси және құқықтық көзқарастары, саяси таланты туралы естеліктерімен бөлісті.
«Мен Д.А.Қонаевпен бірге жұмыс жасаған бақытты адамдардың бірімін. Зейнетке шыққан кезінде ағамызбен етене араластым. Ол кісінің адамгершілігі мен еңбекқорлығына қарап қай кезде болсын тамсанатын едік. Зейнет жасына шықса да, еліне еңбек етіп, болашақ ұрпаққа өшпес із қалдырған болатын. Ол кісінің жарқын бейнесі, қажымас қайраты ұрпақ жадында мәңгі сақталарына сенімдіміз. Бүгін міне жастар да іс-шараға қатысып, өздерінің жүрекжарды тілектерін арнауда. Д.А.Қонаев ел үшін өлшеусіз еңбек еткен ерен тұлға десек, артық айтпағанымыз болар», – дейді Қазақстан Журналистика академиясының вице-президенті Валерий Жандаулетов.
Мемлекет қайраткерінің 111 жылдығына арналған іс-шараның мақсаты – оның ел экономикасы мен саяси аренадағы рөлін ұрпақтан-ұрпаққа насихаттау және дәріптеу. Оның өмірі мен көп қырлы қызметі Қазақстанның ұлы дәуірінің символына айналды.
«Біз жас болсақ та, Д.А.Қонаевтың ұлтына жасаған қызметінен хабарымыз бар. Бүгін группаластарыммен бірге гүл шоқтарын қойып, рухына тағзым етіп, мұражай-үйін аралап шықтық. Бізге өте қатты ұнады. Атамыздың оқыған кітаптарын, демалған орындығын, асханасын көріп қайттық. Бірге 30 жылдай қызметтес болған адамдардың әңгімелерін естіп, біз де жадырап қалдық. Болашақта атамыз секілді елге еңбегі сіңген азамат болсақ деген арманым бар», – дейді ҚР Ұлттық қауіпсіздік комитетінің Шекара академиясының 4 курс курсанты, сержант Әділбек Қапаров.
Қонаевтың шынайы тұлғасын ашуға, яғни оны қарапайым тұлға ретінде көрсетуге мұражай үйі үлкен мүмкіндік береді. Бұл орын Қонаевты тек мемлекет қайраткері ретінде ғана емес, шынайы өмірде болған тұлға ретінде де ашып көрсетті десек, артық айтпағанымыз болар.
«Мұнда сақталған жәдігерлер Дінмұхамед Ахметұлының дүние-мүлікке қызықпайтын қарапайым адам болғанын, оның қарапайым тіршілігін, қалай дем алып, нендей дүниеге қызығушылық білдіретінін аңғартады. Мұражай бұл өткен тарихымызбен таныстыратын орын әрі өнегелі өмірдің нағыз куәгері», – дейді мұражай меңгерушісі Елена Кубашева.
Аталмыш іс-шараға Д.А.Қонаевтың қызметтес ізбасарлары, мемлекет және қоғам қайраткерлері, соғыс және еңбек ардагерлері, туған-туыстары, БАҚ өкілдері, қала тұрғындары мен қонақтары қатысты