Мемлекет басшысының тапсырмасымен 2024 жылдың 1 қаңтарынан бастап іске қосылған «Ұлттық қор – балаларға» бағдарламасы аясында қазақстандық балалардың жинақтары қалыптасып жатыр, деп хабарлайды Aqshamnews.kz тілшісі.
Бағдарламаға сәйкес, жыл сайын Ұлттық қордың инвестициялық кірісінің 50 пайызы Қазақстан азаматтығындағы барлық балалар арасында теңдей бөлінеді. Бұл қаражат балалардың БЖЗҚ-дағы шоттарына нысаналы талап ретінде есептеліп, инвестицияланады.
2025 жылдың қорытындысы бойынша бағдарламаға қатысушы 6 918 656 балаға әрқайсысына 130,71 АҚШ доллары көлемінде қаржы аударылған. Нәтижесінде:
- үшінші жыл қатысып жатқан балалардың жинағы 370,56 доллар,
- екінші жыл қатысқандардікі 263,93 доллар,
- бірінші жыл қатысқандардікі 130,71 доллар болды.
Бағдарлама басталғалы бері Ұлттық қордан балаларға есептелген қаражаттың жалпы көлемі шамамен 2,5 млрд АҚШ долларын құрады.
2026 жылы 356 613 қазақстандық 18 жасқа толып, жинақталған қаражатын тұрғын үй жағдайын жақсартуға, білім алуға немесе зейнетақы жинағы ретінде сақтауға құқылы болады.
Баланың бағдарламаға қатысуы туралы ақпаратты ата-аналар kids.enpf.kz сайты мен eGov mobile қосымшасы арқылы тексере алады.