Бұл наурызда өткізілген «Күй күмбірі» челленджінің жалғасы.
Ұлттық ойындар қазақстандық оқушыларды тәрбиелеу жоспарына енгізілді, деп хабарлайды Almaty-akshamy.kz
Ы. Алтынсарин атындағы Ұлттық білім академиясы тәрбие жұмысын тиімді ұйымдастыру мақсатында орта білім беру ұйымдары үшін жаңа оқу жылына арналған «Тоғыз ай – тоғыз іс-шара» іс-шаралар жоспарын ұсынды.
«Тоғыз оқу айы ішінде оқушылар тоғыз түрлі іс-шараға қатысады. Жоспарды іске асыру наурызда оқушылар арасында өткізілген «Күй күмбірі» республикалық домбырашылар челленджінің жалғасы болып табылады. Барлық іс-шаралар ұлттық құндылықтар негізінде тәрбие процесіне бірыңғай көзқарасты қамтамасыз етуге бағытталған», - деп атап өтті білім академиясының президенті Мадина Тыныбаева.
Айта кетейік, іс-шаралар келесі тәртіпте өткізіледі:
Қыркүйек – «Сергіту сәті»;
Қазан – «Әнұран айту»;
Қараша – «Асық ату»;
Желтоқсан – «Шығарма жазу: болашаққа хат»;
Қаңтар – «Қазақ есебі»;
Ақпан – «Оқуға құштар мектеп»;
Наурыз – «Домбырашылар»;
Сәуір – «Тоғызқұмалақ, шахмат ойыны»;
Мамыр – «Жасыл мекен».