Ұлттық кітап күніне орай Алматыда республикалық жастар конвенті өтті. Іс-шараны Алматы кітапханалары «Ғылым ордасы» және Қазақстан Республикасының Ұлттық кітапханасының қолдауымен ұйымдастырды.
Конвент аясында еліміздің әр өңірінен келген 42 жас маман бастамаларын ұсынып, кітапхана саласындағы заманауи сын-қатерлер мен болашағын талқылады.
Іс-шараның маңызды бөлігінің бірі – өңірлік кітапханашыларға арналған практикум болды. Оны А.П. Чехов атындағы Орталық қалалық кітапхана, С. Бегалин атындағы балалар кітапханасы және «Ғылым ордасы» мамандары жүргізді. Қатысушылар автоматтандырылған кітапханалық ақпараттық жүйемен (АҚАЖ) жұмыс істеуді үйреніп, кітап қорын цифрландыру үдерісімен танысты, сондай-ақ, баспа өнімдерін қалпына келтіру технологиясын меңгерді. Бұл тәжірибе Алматы кітапханаларының сәтті жаңғыртылу үлгісі ретінде басқа өңірлерге де таралуы мүмкін.
Іс-шара соңында өзін-өзі басқару жүйесімен жұмыс істейтін автономды кітапхана таныстырылды. Бұл дәстүрлі кітапхана қызметіне деген көзқарасты өзгертетін инновациялық формат.