ФК «Ақтөбе» жасөспірімдер командасының 15 жастағы қорғаушысы Арон Мұса қайтыс болды, деп хабарлайды Aqshamnews.kz клубтың баспасөз қызметіне сілтеме жасап.
"Кеше, QJ league турнирінде ойнайтын “Ақтөбе U-16” командасының ойыншысы, 15-жастағы футболшы Арон Мұса өмірден озды. Аронның отбасында үлкен қайғы орын алды. Арон бауырымызбен бірге әжесі және немере ағасы да көз жұмды. Мұса әулетіне, туған туыстарына қайғыра көңіл айтамыз", - делінген клуб хабарламасында.
Арон мен оның туыстарының өлімінің себептері нақтыланған жоқ. Ресми расталмаған мәлімет бойынша, отбасы көмірқышқыл газынан уланып, қаза тапқан болуы мүмкін.
Мұса 2010 жылғы 18 сәуірде дүниеге келген. "Ақтөбе" U-16 сапындағы дебюті 2 тамызда өтті. Кейінгі матчін 4 қазанда өткізген. Биылғы маусымда Арон Мұса "Ақтөбенің" жасөспірімдер құрамасында жалпы алты ойынға қатысты.
Айта кетейік, бұл кейінгі бір ай ішіндегі қазақстандық футболдағы екінші қайғылы жағдай. 23 қыркүйекте елордалық "Жеңіс" клубының 19 жастағы футболшысы Виктория Қайсаринова Павлодар – Астана тасжолында болған жол-көлік оқиғасынан қаза тапқан еді.
