Өзбекстанның премьер-министрі қызметтік көлігін ауыстырды
Өзбекстан премьер-министрі Абдулла Арипов өз қызметінде пайдаланған шетелдік Mercedes-Benz маркалы көлігін отандық "Malibu" темір тұлпарына ауыстырды. Бұл туралы aqshamnews.kz хабарлайды UZA ақпарат агенттігіне сілтеме жасап.
Премьер-министрдің айтуынша, ел президенті Шавкат Мирзиёевтің тапсырмасына сәйкес, барлық лауазымды тұлғалар шетелдік маркадағы көліктерден бас тартуға міндеттелген. Әрине, бұл процесс 20 наурыздан немесе 1 сәуірден басталуы жоспарланғанымен, тапсырма уақытынан бұрын орындалуы тиіс болғандықтан, жұмыстар ерте басталды. Арипов бұл өзгерістің жедел әрі тиімді түрде жүзеге асырылуы қажет екенін атап өтті.
Өзбекстанда барлық министрліктер мен ведомстволар отандық көліктерді пайдалану режиміне көшкен. Мысалы, премьер-министрдің орынбасарлары "Malibu" маркалы көліктерге отыратын болса, облыс хокимдері "Tahoe" және "Traverse" жол талғамайтын көліктерін қолдануда. Шенеуніктерге жаңадан сатып алынған емес, бұрыннан қолданылып келген көліктер беріледі.
Сонымен қатар, бұрынғы шетелдік көліктер аукцион арқылы сатылымға шығарылады.
Өзбекстан президенті Шавкат Мирзиёев осыған дейін сыбайлас жемқорлыққа қарсы күрес жөніндегі ұлттық кеңесте сөйлеген сөзінде шетелдік қызметтік көліктерді қысқартуды және отандық көлік өндірісін қолдауды тапсырған болатын.