Президенттің Каспий теңізін кешенді зерттеу, сақтау және өңірдің экологиялық тұрақтылығын қолдау жөніндегі тапсырмалары аясында Үкімет резервінен «Каспий теңізі Қазақ ғылыми-зерттеу институтына» 1,1 млрд теңге бөлінді, – деп хабарлайды aqshamnews.kz тілшісі.
Үкіметтің баспасөз қызметінің мәліметінше, бөлінген қаражат институттың ғылыми әлеуетін арттыруға бағытталады. Атап айтқанда, теңіздегі мониторинг жұмыстарын жүргізуге қажетті негізгі жабдықтарды сатып алу, сондай-ақ гидробиологиялық және гидрохимиялық зертханаларды заманауи құралдармен жарақтандыру жоспарланған. Бұл Каспийдің қазақстандық секторында жүріп жатқан үдерістер бойынша өз ғылыми-негізделген деректер базасын қалыптастыруға мүмкіндік береді.
Қаулының орындалуы Экология және табиғи ресурстар министрлігі мен Қаржы министрлігіне жүктеліп, бөлінген қаржының мақсатты әрі тиімді жұмсалуы талап етілді.