Италияда өткен қысқы Олимпиада ойындарының чемпионы Михаил Шайдоров Алматыға ұшып келді, деп хабарлайды Aqshamnews.kz тілшісі.
Түнгі уақытқа қарамастан Алматы халықаралық әуежайының терминалында спортшыны қарсы алуға жиналғандардың қарасы қалың болды. Чемпионды қала әкімдігінің өкілдері, туған-туыстары мен жанкүйерлері арнайы күтіп алды.
Шайдоровты күтіп алуға жиналған жұрт оны тапжылмай 2 сағаттан астам уақыт күтті. Ұшақтың кешігуіне қарамастан, ыстық ықылас бір сәт те сейілген жоқ. Әуежай іші нағыз мерекелік көңіл күйге бөленіп, алматылықтар ән шырқап, би биледі.
Алматы жұрты тарихи жүлде иесін зор қошеметпен қарсы алып, құрмет көрсетті. Әуежай ішін қол шапалақ пен қуанышқа толы үндер кернеді.
Өз кезегінде Михаил Шайдоров туған жерге оралған сәттегі әсерін бөлісіп, қолдау білдірген алматылықтарға алғыс айтты.
«Үйге жеттім-ау! Туып-өскен қалама, қазір және болашақта тұратын қалама келгеніме қуаныштымын. Туған жеріңде осындай жылы лебізді сезіну – сөзбен айтып жеткізу мүмкін емес. Әрдайым қолдау білдірген сіздерге алғыс білдіремін», – деді ол.
Спортшы алдағы уақытта да халықаралық жарыстарда ел намысын қорғап, жоғары нәтижелерге ұмтылатынын жеткізді. Сондай-ақ мәнерлеп сырғанауды ел ішінде кеңінен насихаттап, осы спорт түрінің дамуына үлес қосуды жоспарлап отырғанын атап өтті.
Кездесу соңында суретші Әсел Сабыржанқызы (assolyaa) Михаил Шайдоровқа өзі салған кілемдегі портретін сыйға тартты. Өнер иесі бұл туындыны «халықтың сыйы» деп атады.
