Алматы қаласы бойынша ҚАЖ департаментінің №11 мекемесінде «Заманға сай жасstar!» деген тақырыппен КВН өтті. Көңілді тапқырлар алаңына Алматы индустрия және қонақжай туризм колледжінің «Кеттік, бәрін таста!» командасы, Алматы технология және флористика колледжінің «Активі», Алматы дизайн және мода колледжінің «Акмис» тобы, №11 мекемесінің «Жастары» қатысты.
Олар «Сәлемдесу», «Бес жаналық», «Үй тапсырмасы» кезеңдері бойынша сайысқа түсті. Жастардың сергектігі, білімі, әзілкештігі, сол арқылы тақырыптарды аша білуі қуантты бізді.
– Түзеу колониясында жазасын өтеп жатқан жасөспірімдерге мұндай іс-шаралар ауадай қажет. Олар бас бостандығынан айырылып, жабық мекемеде отырғандықтан сыртқы байланыстың орнын осындай түрлі танымдық, рухани, мәдени кештермен толтырады. Сол арқылы қоғамдағы жағдайлардан да хабардар болып отырады, білімін шыңдайды. Біздің мекемеге келіп өнер көрсеткен жастарға және өзімізде тәрбиеленіп жатқан жеткіншектерге алғырлығы, өмірге құштарлығы үшін алғыс айтамын, – деді мекеме бастығы әділет полковнигі Алмат Сүлейменов.
Көңілділер мен тапқырлардың жарысы өте тарысты да қызықты өтті. Нәтижесінде 1-орынды №11 мекемесінің «Жастар» командасы иеленді. 2-орынды Алматы технология және флористика колледжінің «Активі» командасы алса, 3-орын Алматы дизайн және мода колледжінің «Акмисі» мен Алматы индустрия және қонақжай туризм колледжінің «Кеттік, бәрін таста!» командасына ие бұйырды.