2026 жылдың 20–29 қаңтар аралығында Алматы қаласы аумағында отбасылық-тұрмыстық қатынастар саласында жасалатын құқық бұзушылықтардың алдын алу және жолын кесуге бағытталған «Тұрмыс» атты қалалық жедел-профилактикалық іс-шарасы өткізіледі.
Іс-шараның негізгі мақсаты – тұрмыстық қылмыстар деңгейін төмендету, азаматтардың өмірі мен денсаулығын қорғау, сондай-ақ отбасындағы зорлық-зомбылықтың алдын алу. Жедел-профилактикалық іс-шара аясында полиция қызметкерлері профилактикалық есепте тұрған тұлғаларды тексеру, қолайсыз отбасыларды аралау, сондай-ақ халық арасында түсіндіру жұмыстарын жүргізу сияқты кешенді профилактикалық шараларды жүзеге асырады.
Алматы қаласы полиция Департаменті Қоғамдық қауіпсіздік басқармасының отбасылық-тұрмыстық зорлық-зомбылыққа қарсы күрес бөлімінің бастығы полиция подполковнигі Қантарбаева Жадра Джелеуовна атап өткендей: «„Тұрмыс“ атты жедел-профилактикалық іс-шарасын өткізу, ең алдымен, отбасылық-тұрмыстық жанжалдардың ауыр салдарының алдын алуға бағытталған. Біздің басты міндетіміз – проблемалық жағдайларды дер кезінде анықтау, жәбірленушілерге көмек көрсету және тұрмыстық салада құқыққа қарсы әрекеттерге жол беретін тұлғаларға қатысты тиісті шаралар қабылдау».
Іс-шара барысында профилактика органдарымен, әлеуметтік қорғау және жергілікті өзін-өзі басқару органдарымен өзара іс-қимылға, сондай-ақ азаматтардың хабарламаларына жедел ден қоюға ерекше назар аударылады. Құқық қорғау органдары өңір тұрғындарын бейжай қарамауға және отбасылық-тұрмыстық зорлық-зомбылық фактілері немесе оның жасалу қаупі туралы полиция органдарына уақтылы хабарлауға шақырады.
