Алдағы жылыту маусымына дайындық аясында Алматының Түрксіб ауданында жылу желілерін жоспарлы түрде қайта жаңарту жұмыстары жалғасуда. Жұмыс барысында 1965 жылы пайдалануға берілген жалпы ұзындығы 4,1 шақырым болатын жылу трассасы ауыстырылып жатыр.
Осыған байланысты 2025 жылы 29 шілдеден 31 тамызына дейін Лавренев көшесінің батыс жағында Наманганская көшесі, 43а үйден Майлин көшесіне дейін автокөлік қозғалысы шектеледі. Қос бағыттағы қозғалыс көшенің шығыс жағында ұйымдастырылады.
Құбырдың жол бойының астынан өтетін бөлігін қайта жаңарту жұмыстарының қауіпсіздігін қамтамасыз ету үшін шектеулер енгізіледі. Қайта жаңарту кезінде тұрғындарға ыстық су үздіксіз беріледі.
Аталған жылу трассасы 42 көпқабатты тұрғын үйді, балабақшаны, емхананы және тағы 4 нысанды жылу энергиясымен және ыстық сумен қамтамасыз етеді.
Жалпы, биыл қала бойынша 39 шақырым жылу желісін жаңарту жоспарланған. Бұл тозу деңгейін 54%-ға дейін төмендетуге мүмкіндік береді.
Айта кетейік, қозғалыс шектеуі туралы барлық ақпарат Almaty.kz сайтында, @AlmatyJoly Telegram-арнасында, аудан әкімдіктері мен басқармалардың әлеуметтік желілерінде, сондай-ақ «2GIS» және «Яндекс карты» сервистерінде жарияланады.