Алматы әкімі Ерболат Досаев Түрксіб ауданының тұрғындарымен кездесу барысында электр желілерін реконструкциялау бойынша атқарылған жұмыстар мен алдағы жоспарлар туралы айтып берді, деп хабарлайды aqshamnews.kz
Қала басшысының айтуынша, «Әлмерек», «Нұршашқан» және «Қайрат» шағын аудандарының тұрғындарын үздіксіз электр қуатымен қамтамасыз ету үшін «Тұздыбастау» қосалқы станциясы салынды. Қосалқы станцияны «Тұздыбастау» қосалқы станциясын «Бесағаш» қосалқы станциясымен байланыстыратын кабельдік желілерді төсеу жұмыстары аяқталған соң, 2024 жылдың желтоқсан айының соңына дейін іске қосу жоспарланып отыр.
Сонымен қатар, аталған шағын аудандарда 110 км электр желілерін жаңарту жұмыстары жүргізілуде. Жұмыстар 2024 жылдың соңына дейін аяқталады деп жоспарлануда.
Жалпы, Алматы қаласында жыл басынан бері 76 км электр желісінің 66 км-і жаңартылды.
Сонымен қатар, биыл магистральді көшелерде 25 км сыртқы жарықтандыру жүйесі жөнделіп, 250 км-ден астам кабель тартылып, 1800 бағана орнатылды.