16 сәуірде Түркияның Тоқат қаласында тоғызқұмалақ, бестемше және мангала ойындарынан халықаралық "Еуразия кубогі" жарысы басталды, – деп хабарлайды aqshamnews.kz тілшісі.
Жарысқа Қазақстан, Египет, Сирия, Түркия және Чехиядан 40-қа жуық спортшы қатысып жатыр. Бүгін жарыстың ашылу салтанатында қала әкімі Mehmet YAZICIOGLU түркі халықтарының зияткерлік ойындарының маңызына тоқталып, спортшыларға сәттілік тіледі.
Тоқат қаласының депутаты Кадим Дурмаз ашылу сөзінде бұл ойындардың еларалық достық қарым-қатынастарды нығайтуда маңызы зор екенін атап өтті.
Дүниежүзілік Тоғызқұмалақ Федерациясының бас хатшысы Махсат Шотаев жарысқа жиналған қауымға сәттілік тілеп, қала әкіміне шапан жапты. Жалпы жарыс 19 сәуірге дейін созылады. Бүгін тоғызқұмалақтың блиц жарысында ерлер арасында түрік спортшысы Демир Жалел чемпион болса, қыздар арасында Астанадан келген Аманжолова Алтынай чемпион атанды.
Жарыс Дүниежүзілік Тоғызқұмалақ Федерациясы және Тоқат қаласы әкімдігіінің қолдауымен, Түркия тоғызқұмалақ, бестеше және мангала Ассоациясының ұйымдастыруымен өтіп жатыр.