Түркістандағы жатақханада қыздар ұлдардың бөлмесі мен әжетханасын тазалауға мәжбүр болған. Білім басқармасы оқиғаға пікір білдірді, – деп хабарлайды aqshamnews.kz тілшісі.
Оқиға Түркістандағы көпбейінді индустриялық-техникалық колледжде болған.
Студент қыздар жатақханадағы ұлдардың бөлмесі мен әжетханасын тазалауға мәжбүр болған. Видео әлеуметтік желіде тарады.
Жатақханадағы әкімші қызметкерлер "тексеріс келеді" деген жалаумен қыздарға ұлдардың бөлмесін тазалап беруін сұраған. Олар қарсылық білдірген. Алайда әкімшідік "тәртіпке бағынбағандарды" жатақханадан шығарамыз деп қорқытқан.
"Ертең бізге жатақхананың ашылуына комиссия келеді. Балалардың жатуына рұқсат беру мәселесі бойынша тексеріс болады. Соған дайындалып жатырмыз. Ал сен бәрін дүрліктіріп, шу шығарасың. Бір бөлмені тазаласаң, бір жерің түсіп қала ма? Сен қыз емессің бе? " – дейді видеодағы қызметкер әйел.
Түркістан облысының білім басқармасы оқиғаның көпсалалы индустриалды-техникалық колледжде болғанын растады. Басқарма жағдайды бірден бақылауға алып, арнайы комиссия құрып, тиісті зерделеу жұмыстарын жүргізгенін айтты.
2026 жылғы 23-25 ақпан күндері өтетін техникалық және кәсіптік білім беру ұйымдарының студенттері арасындағы облыстық (аймақтық) спартакиадаға қатысатын студенттерді жатақханаға орналастыру мақсатында колледж тәрбиешісі мен вахтер қызметкерлері жатақхана студенттеріне ауызша түрде ұсыныс жасаған", – делінген хабарламада.
Қазір студенттермен және олардың ата-аналарымен түсіндіру жұмыстары жүргізіліп жатқаны айтылды.