Түркістан облысында жеңіл көлік пен жүк көлігі соқтығысып, үш кәмелетке толмаған жолаушы оқиға орнында көз жұмды, деп хабарлайды Aqshamnews.kz.
Қайғылы жағдай 22 сәуірде Арыс – Шардара автожолында болған. Алдын ала мәлімет бойынша, Chevrolet Cobalt автокөлігі мен КамАЗ жүк көлігі соқтығысқан.
Түркістан облысы полиция департаментінің хабарлауынша, жол апаты салдарынан жеңіл көліктегі үш жолаушы оқиға орнында қаза тапты. Chevrolet Cobalt жүргізушісі мен тағы бір жолаушы медициналық мекемеге жеткізілді.
Жүк көлігінің жүргізушісі уақытша ұстау изоляторына қамалды.
Алдын ала дерекке сүйенсек, кәмелетке толмаған спортшылар жаттықтырушы-жүргізушімен бірге Түркістанға жарысқа бара жатқан. Алайда балаларды тасымалдау туралы уәкілетті мемлекеттік органдарға алдын ала хабар берілмегені айтылды.
Қазір аталған дерек бойынша сотқа дейінгі тергеу жүргізіліп жатыр. Тергеу балалардың өмірі мен денсаулығының қауіпсіздігін қамтамасыз ету міндеттерін тиісінше орындамау фактісін де қамтиды.
Өзге ақпарат тергеу мүддесіне байланысты жария етілмейді.