Алматыда туристерге бағытталған алаяқтыққа қарсы күрес күшейтілуде - ҚТА мен полициядан алдын алу кеңестері
Алматыда туристік алаяқтықтың алдын алу шаралары күшейтілуде. 2024 жылы елімізде интернет-алаяқтықтың 17 мыңнан астам оқиғасы тіркеліп, бұл өткен жылмен салыстырғанда 13%-ға көп. Келтірілген шығын 20 млрд теңгеден асты. Бұл туралы Қазақстан туристік қауымдастығының директоры Рашида Шайкенова өңірлік коммуникациялар қызметінің баспасөз конференциясында мәлімдеді, деп хабарлайды aqshamnews.kz
Оның айтуынша, қазақстандықтар, оның ішінде алматылықтар келісімшарттық міндеттемелерді бұзатын жосықсыз туристік компаниялармен жиі кездеседі. «Қазіргі уақытта Туризм индустриясы комитетінде 50-ден астам сот ісі қаралуда. Олардың шамамен 40-ында сот шешімі туристердің пайдасына шықты», – деді Шайкенова.
Спикердің айтуынша, ерекше қауіп төндіретіні – «крипто-туристік схемалар» деп аталатын алаяқтық түрлері. Мұндай жағдайда алаяқтар жалған аккаунттар ашып, арзан авиабилеттерді ұсынады да, алдын ала төлем алғаннан кейін жоғалып кетеді.
«Лицензияның болуын, компанияның жұмыс мерзімін, шарттардың ашықтығын және ресми төлем әдістерін тексеру маңызды», - деп атап өтті ол. Сондай-ақ, нақты пікірлер мен құжаттарға назар аудару керек.
Алматы полиция департаменті тергеу басқармасы бастығының орынбасары Қайрат Қасымбаев атап өткендей, қала полициясы туристік саладағы алаяқтық туралы барлық белгілерді мұқият қадағалап отырады. «Өтініштер келіп түскен кезде материалдар сотқа дейінгі тергеудің бірыңғай тізілімінде тіркеледі. Жедел іс-шаралар жүргізілуде, ал кінәлілер жауапқа тартылады», - деп хабарлады ол.
Полиция азаматтарға тек ресми тіркелген туроператорға хабарласуды және ақшаны күмәнді делдалдарға бермеуді ұсынады. Күдікті жағдайлар туындаған жағдайда құқық қорғау органдарына дереу хабарласу маңызды.