Премьер-Министр Олжас Бектеновтің төрағалығымен өткен Үкімет отырысында туризм саласын цифрландыру және дамыту жөніндегі шаралар қаралды.
Мемлекет басшысының Алматыны заманауи туристік және мәдени орталыққа айналдыру жөніндегі тапсырмаларын орындауға ерекше назар аударылды, деп хабарлайды aqshamnews.kz.
Қала әкімі Ерболат Досаев өз сөзінде қаланың туристік сервистерінің цифрлық платформасының өзегіне айналатын SuperApp мобильді қосымшасын құруды ұсынды.
«Бұл тұрғындарға да, туристерге де ыңғайлылықты қамтамасыз ете отырып, барлық қалалық қызметтерге қол жеткізу үшін негізгі цифрлық платформа болады», — деп атап өтті Ерболат Досаев.Ол SuperApp-тың басым бағыттарының бірі – туристік модульді дамытып, барлық негізгі сервистерді бірыңғай цифрлық экосистемаға біріктіретінін атап өтті. Пайдаланушыларға мәдени және спорттық іс-шараларға билет сатып алу, цифрланған жолдар мен туристік бағыттар бойынша маршруттарды зерттеп, жоспарлау, Алматы бойынша турлар мен экскурсияларды брондау, қаланың көрнекті жерлерімен VR-серуен жасау сияқты функциялар қарастырылған. 2025 жылдың 1 шілдесіне дейін қосымшаға 113 мәдени және спорттық нысандарды біріктіру жоспарлануда, бұл демалысты жоспарлауға қол жетімді және ыңғайлы етеді.