Вашингтондағы Washington Hilton қонақүйінде Ақ үй тілшілерінің қауымдастығы ұйымдастырған кешкі қабылдау кезінде қарулы ер адам қауіпсіздік бекетіне шабуыл жасады. Оқиға кезінде АҚШ президенті Дональд Трамп, бірінші ханым Мелания Трамп және бірқатар жоғары лауазымды тұлғалар эвакуацияланды, деп хабарлайды Aqshamnews.kz тілшісі.
АҚШ БАҚ-тарының мәліметінше, күдікті Калифорния штатының 31 жастағы тұрғыны Коул Томас Аллен. Оның жанынан мылтық, тапанша және бірнеше пышақ табылған. Ол Секрет қызметінің бақылау бекетінде оқ атқан. Оқтардың бірі агенттің оқ өткізбейтін жилетіне тиген, соның арқасында қызметкер аман қалған.
Күдікті оқ жарақатынсыз ұсталып, медициналық тексеру үшін ауруханаға жеткізілді. Қазір ФБР мен жергілікті полиция оның әрекетінің себебін анықтап жатыр. Алдын ала мәлімет бойынша, ол жалғыз әрекет еткен болуы мүмкін.
Оқиғадан кейін Дональд Трамп Ақ үйде журналистерге мәлімдеме жасап, шабуылдаушыны «жалғыз әрекет еткен науқас адам» деп атады. Ол қауіпсіздік қызметінің жедел әрекетін жоғары бағалап, бастапқыда эвакуацияға қарсылық танытқанын да айтты.
Шабуыл салдарынан салтанатты кеш тоқтатылды. Іс-шара кейінге шегерілді.