Мемлекет басшысы Қасым-Жомарт Тоқаев Саяси қуғын-сүргін және ашаршылық құрбандарын еске алу күніне байланысты үндеу жариялады, деп хабарлайды Aqshamnews.kz тілшісі Ақордаға сілтеме жасап.
Президент 31 мамырда қазақ халқы өткен ғасырдың бірінші жартысында саяси қуғын-сүргін құрбаны болған азаматтардың рухына тағзым ететінін атап өтті.
«Оларды жадымызда сақтау, заңдылық қағидаты мен әділдік құндылықтарына адал болу – біздің қастерлі борышымыз», – деді Қасым-Жомарт Тоқаев.
Мемлекет басшысының айтуынша, Қазақстанда азаматтардың құқықтары мен бостандықтарын жан-жақты қорғауға бағытталған жүйелі жұмыс жүргізіліп жатыр. Бұл міндет 15 наурыздағы жалпыұлттық референдумда қабылданған Конституцияда заң жүзінде бекітілген.
Президент елдің озық ойлы қоғам құру жолына бет бұрғанын айтып, Әділдік, Заңдылық, Отаншылдық, Еңбекқорлық және Табиғатқа сүйіспеншілік қағидаттарының маңызы арта түсетінін жеткізді. Сонымен қатар ғылымды, жоғары технологияларды, мәдениетті және еріктілер қозғалысын дамытуға басымдық берілетінін атап өтті.
«Қазақстанның болашағы әрдайым жарқын болмақ! Мен бұған кәміл сенемін», – деді Президент