Мемлекет басшысы Қасым-Жомарт Тоқаев Алғыс айту күніне орай қазақстандықтарды құттықтап, бірлік пен өзара құрметтің маңызын атап өтті, деп хабарлайды Aqshamnews.kz тілшісі.
Президент Алғыс айту күні – халқымыздың ең асыл құндылықтарын дәріптейтін ерекше мереке екенін айтты. Оның сөзінше, өзара құрмет, жанашырлық пен тілеулестік – ұлтымыздың бойына сіңген қасиеттер.
Мемлекет басшысы бұл күні ең алдымен қиын-қыстау кезеңдерде елді аман сақтап, ұрпаққа мол мұра қалдырған ата-бабаларға тағзым жасалатынын жеткізді. Сондай-ақ ұстаздар, дәрігерлер, мәдениет саласы қызметкерлері, кәсіпкерлер, жұмысшылар, тәртіп сақшылары, өрт сөндірушілер мен құтқарушылардың еңбегіне алғыс білдірді.
Президент жастар мен еріктілердің қоғам игілігі жолындағы белсенді еңбегін ерекше атап өтіп, олардың ісін жасампаз әрі жауапты отаншылдықтың айқын көрінісі деп бағалады.
Қасым-Жомарт Тоқаев еліміз тарихи бетбұрыс кезеңіне қадам басқанын айтып, республикалық референдумға шығарылған жаңа Конституция жобасы адам құқықтарын қорғау жүйесін жетілдіруге және Тәуелсіздікті нығайтуға мүмкіндік беретінін жеткізді.
Сондай-ақ Алғыс айту күні ел тағдыры әр азаматтың қолында екенін айқын көрсететінін атап өтті. Президент заң мен тәртіпті, ынтымақ пен бірлікті ту еткен жағдайда Қуатты, Әділетті, Таза және Өркендеген Қазақстанды бірге құруға болатынын айтты.
Мемлекет басшысы барша қазақстандықтарға амандық пен табыс тіледі.