Мемлекет басшысы Қасым-Жомарт Тоқаев барлық деңгейдегі мәслихат депутаттарының ІІІ республикалық форумында халықпен ашық әрі түсінікті диалог орнатудың маңызын атап өтті, – деп хабарлайды aqshamnews.kz тілшісі.
Президенттің айтуынша, жергілікті билік тұрғындардың мәселесін дер кезінде шешіп, олардың сенімін арттыруға күш салуы керек.
Президент соңғы жылдары орталыққа өңірлерден келіп түсетін арыз-шағымдардың саны артқанын айтты. Былтыр Президент Әкімшілігіне шамамен 83 мың өтініш түскен, бұл алдыңғы жылмен салыстырғанда 30 пайызға көп.
Мемлекет басшысы көптеген мәселені жергілікті деңгейде шешуге болатынын атап өтті. Алайда кей жағдайда тұрғындар өңірлік биліктен түсініктеме ала алмағандықтан, тікелей Президентке жүгінуге мәжбүр болады.
«Мәслихат депутаттары халық пен билік арасындағы көпір болуға тиіс. Олар тұрғындардың мәселесін шешуге көмектесуі керек. Бұл жұмысқа олардың құзыреті толық жетеді», – деді Қасым-Жомарт Тоқаев.
Президенттің айтуынша, былтыр облыстық деңгейдегі атқарушы органдарға шамамен 6 мың депутаттық сауал жолданған. Дегенмен, олардың саны емес, сапасы маңызды.
Мемлекет басшысы аймақтардың дамуы, халықтың тұрмыс сапасының жақсаруы және азаматтардың билікке деген сенімі депутаттардың жұмысына тікелей байланысты екенін атап өтті.