Себебі, елде туу көрсеткіші төмендеп кеткен.
Токио билігі қатты төмендеп кеткен туу көрсеткішін көтеру мақсатында мемлекет қызметкерлерінің бәріне төрт күндік жұмыс аптасын енгізеді, деп хабарлайды aqshamnews.kz CNN телеарнасына сілтеме жасап.
Қала әкімдігінің ақпаратына сай, қызметкерлерге аптасына үш күн демалуға мүмкіндік беретін өзгеріс сәуірде күшіне енеді. Бұған қоса бастауыш сыныпта оқитын баласы бар ата-аналарға жұмыстан ертерек босауға рұқсат беретін тағы бір өзгеріс жарияланды.
"Біз жұмыс істеу тәртібін қайта қараймыз. Енді ешкім бала туу немесе бала күтімі секілді үйдегі мәселелерге байланысты жұмыстағы мансабынан бас тартпайтын болады", - деп мәлімдеді Токио губернаторы Юрико Коикэ.
Жапонияда туу көрсеткіші көптеген жылдар бойы төмендеп кеткен. Үкіметтің жастарға отбасын құруға жағдай жасап жатқанына қарамастан, туу көрсеткіші жақсарар емес. Былтыр осы елде бар болғаны 727 277 бала дүниеге келген. Жапонияда әйелдердің орташа бала санына қатысты көрсеткіші 1,2 ғана болған. Халық санын тұрақты түрде ұстап тұру үшін мұндай көрсеткіш кем дегенде 2,1 болуы керек. Жапония үкіметі демографиялық дағдарысты еңсеру мақсатында түрлі бағдарламалар енгізіп жатыр. Бұл елде ер азаматтар бала күту үшін ақылы демалысқа шыға алады. Әлеуметтанушылардың көбі туу деңгейінің төмендеуін Жапониядағы еңбек мәдениеті мен өмір сүру құнының қымбаттауымен түсіндіреді.